قىتاي - قىرعىزستان - وزبەكستان تەمىرجولىنىڭ قۇرىلىسى باستالدى

استانا. KAZINFORM - قىتاي - قىرعىزستان - وزبەكستان تەمىرجولىنىڭ جوباسى تۋرالى ۇكىمەتارالىق كەلىسىمگە قول قويىلعانىنا جىلعا جۋىق ۋاقىت وتكەندە نەگىزگى ماگيسترالدىڭ قۇرىلىسى رەسمي باستالدى.

شينحۋا اگەنتتىگىنىڭ حابارلاۋىنشا، قىتاي- قىرعىزستان- وزبەكستان تەمىرجولىنىڭ قىرعىزستان اۋماعىنداعى نەگىزگى نىساندارى - فەرعانا، نارىن-1 جانە كوش-ءتوبو تۋننەلدەرىنىڭ قۇرىلىسى ءساۋىر ايىنىڭ سوڭعى كۇندەرى باستالدى. بۇل - اتالعان جوبانىڭ ناقتى قۇرىلىس كەزەڭىنە اياق باسقانىن بىلدىرەدى.

اتالعان ءۇش تۋننەلدىڭ ۇشەۋى دە ءبىر باعىتتى، ءبىر جولاقتى جانە ءارقايسىسىنىڭ ۇزىندىعى 10 شاقىرىمنان كەم ەمەس. بۇل تۋننەلدەر قىتاي- قىرعىزستان- وزبەكستان تەمىرجولىنىڭ اسا ماڭىزدى ستراتەگيالىق بولىكتەرى سانالادى. اگەنتتىكتىڭ جازۋىنشا، جوبا بيىك تاۋلى، كليماتى قاتال، سەيسميكالىق بەلسەندى، گەولوگيالىق قىسىمى جوعارى، جەر بەدەرى كۇردەلى، كولىك قاتىناسى قيىن ايماقتا جۇرگىزىلىپ جاتىر، قۇرىلىس جۇمىستارىنىڭ وڭايعا تۇسپەيتىنى بەلگىلى.

وتكەن جىلدىڭ ماۋسىم ايىندا قىتاي، قىرعىزستان جانە وزبەكستان ۇكىمەتتەرى اتالعان تەمىرجول جوباسى بويىنشا ۇكىمەتارالىق كەلىسىمگە قول قويعان بولاتىن. ءسويتىپ، 27 جىل بويى كەيىنگە شەگەرىلىپ كەلگەن تەمىرجول جوباسى شىن مانىندە جۇزەگە اسىرىلا باستاعان ەدى.

Lianhe Zaobao باسىلىمىنىڭ جازۋىنشا، قىتاي- قىرعىزستان- وزبەكستان تەمىرجولى قىتايدىڭ شۇار اۋماعىنداعى قاشقار قالاسىنان باستالىپ، تورعات اسۋى ارقىلى قىرعىزستان جەرىنە وتەدى. ءارى قاراي قىرعىزستاننىڭ شەكارالىق جالالاباد قالاسى ارقىلى وزبەكستاننىڭ شىعىسىنداعى ءاندىجان قالاسىنا جەتەدى.

اتالعان تەمىرجولدىڭ جالپى ۇزىندىعى - 523 شاقىرىم. بولاشاقتا تەمىرجول ماگيسترالى تاياۋ شىعىس، وڭتۇستىك ازيا مەن ەۋروپا ايماقتارىنا دەيىن ۇزارۋى مۇمكىن. ساراپشىلار بۇل جوبا قىتايدىڭ ورتالىق ازيا ەلدەرىمەن جانە وزگە ايماقتارمەن ىنتىماقتاستىعىن تەرەڭدەتۋدە ماڭىزدى ءرول اتقارادى دەپ سانايدى.

وتكەن جىلى بەيجىڭدە قىتاي حالىق رەسپۋبليكاسى، قىرعىز رەسپۋبليكاسى، وزبەكستان رەسپۋبليكاسى ۇكىمەتتەرىنىڭ اراسىندا «قىتاي- قىرعىزستان- وزبەكستان» تەمىر جولىن سالۋ جوباسى بويىنشا كەلىسىمگە قول قويۋ ءراسىمى وتكەنىن حابارلاعان ەدىك.

اۆتور

ەرلان مازان