قىتاي قازاقستاننان 20 مىڭ توننا شوشقا ەتىن يمپورتتاۋعا نيەتتى

استانا. KAZINFORM - شاڭحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ 24-شى وتىرىسى اياسىندا قىتاي ەت قاۋىمداستىعىنىڭ وكىلدەرى سولتۇستىك قازاقستان وبلىسىنداعى «EMC Agro» ونەركاسىپ كەشەنىندە بولدى، دەپ حابارلايدى ق ر ساۋدا جانە ينتەگراتسيا مينيسترلىگى.

قوناقتارعا مال سويۋدان باستاپ ودان ءارى ىشكى نارىققا شىعارۋ ءۇشىن ولشەپ-وراۋعا دەيىنگى بارلىق وڭدەۋ سيكلى كورسەتىلدى. بۇكىل پروتسەسس اۆتوماتتاندىرىلعان جانە حالىقارالىق سانيتارلىق-ەپيدەميالىق تالاپتارعا سايكەس كەلەدى. ساپانى باقىلاۋدى تاۋلىك بويى نەمىس اناليزاتورلارىمەن جابدىقتالعان زەرتحانا قامتاماسىز ەتەدى. دايىن ءونىم ارنايى مۇزداتقىش سەحتا ساقتالادى.

كاسىپورىننىڭ جۇمىسىمەن تانىسقاننان سوڭ، تاراپتار ىنتىماقتاستىق پەرسپەكتيۆالارىن تالقىلادى. قىتاي ەت قاۋىمداستىعى جىلىنا 20 مىڭ توننا شوشقا ەتىن يمپورتتاۋعا قىزىعۋشىلىق تانىتتى.

ءوز كەزەگىندە، «EMC Agro» كومپانياسىنىڭ ونەركاسىپتىك كەشەنى قىتايعا شىعارىلاتىن ءونىمنىڭ ` عا جۋىعىن جەتكىزۋگە دايىن.

«قازاقستان - مۇمكىندىكتەرگە تولى ەل. بۇگىندە قىتاي ەت قاۋىمداستىعىنا كىرەتىن كومپانيالاردىڭ ءبىرى جەرگىلىكتى كاسىپورىننان شوشقا ەتىن ساتىپ الۋدى جوسپارلاپ وتىر. اڭگىمە جىلىنا 20 مىڭ توننا تۋرالى بولىپ وتىر. ءبىراق ءبىز قوي مەن سيىر ەتىنە دە مۇددەلىمىز. سونداي-اق قازاقستاندىقتارعا مال شارۋاشىلىعىن دامىتۋدا جانە ءىرى جانە ۇساق مال ەتىن قىتايعا ەكسپورتتاۋدا كومەك كورسەتۋ ءۇشىن ءوز تاجىريبەلەرىمەن بولىسۋگە دايىنبىز»، - دەپ اتاپ ءوتتى قىتاي ەت قاۋىمداستىعىنىڭ سيىر ەتىن يمپورتتاۋشىلار جانە ەكسپورتتاۋشىلار كلۋبىنىڭ پرەزيدەنتى ما گۋانشەن.

«قىتايلىق بيزنەس- قوعامداستىق وكىلدەرى بىرلەسكەن پەرسپەكتيۆالى جوبالاردى ىسكە اسىرۋعا ۇلكەن قىزىعۋشىلىق تانىتىپ، قازاقستاندىق سەرىكتەستەرمەن تابىستى ىنتىماقتاستىققا ءۇمىتتى. قىتايدىڭ تالاپتارى جوعارى ەكەنىن ءتۇسىنۋ كەرەك. جەتكىزۋ كولەمى تۇراقتى، شيكىزات قاۋىپسىز بولۋى ءتيىس. ءبىزدىڭ ەتىمىز جوعارى ساپالى، ءبىز ءوز ونىمىمىزگە كۇمان كەلتىرمەيمىز، جەمىستى ىنتىماقتاستىققا دايىنبىز. كورشى نارىق ءبىز ءۇشىن ماڭىزدى»، - دەدى ءوز كەزەگىندە «EMC Agro» كومپانياسىنىڭ باسشىسى ەرجان ەلەۋبايەۆ.

ايتا كەتۋ كەرەك، قازاقستاننىڭ اۋىل شارۋاشىلىعى ونەركاسىبى مەملەكەت باسشىسىنىڭ ەرەكشە باقىلاۋىندا. قاسىم-جومارت توقايەۆ فەرمەرلەردىڭ الدىنا ازىق-تۇلىك قاۋىپسىزدىگىمەن قاتار زاۋىتتاردىڭ وندىرىستىك بازاسىن كەڭەيتۋ، قازاقستاندىقتاردى ساپالى ونىممەن، ال ينۆەستورلاردى ۇزدىكسىز ەكسپورتپەن قامتاماسىز ەتۋ مىندەتىن قويدى.

قىتاي ەت قاۋىمداستىعى ق ح ر-داعى ەت ءوندىرۋ جانە تاراتۋ بويىنشا ەڭ ءىرى ۇلتتىق بىرلەستىك بولىپ تابىلادى جانە وعان 1300 گە جۋىق مۇشە كىرەدى.

ال، «EMC Agro» - قازاقستانداعى ءىرى ەت وڭدەيتىن كاسىپورىنداردىڭ ءبىرى. كاسىپورىن تۇپكى تۇتىنۋشى ءۇشىن جوعارى ساپالى، ەكولوگيالىق تازا ءونىم ءوندىرۋ مەن جەتكىزۋگە جانە ەلىمىزدىڭ ەت نارىعىنداعى سۇرانىستى تولىق قامتاماسىز ەتۋگە باعىتتالعان. ەت كومبيناتىنىڭ وندىرىستىك قۋاتى جىلىنا 20 مىڭ توننا ەت جانە تاۋلىگىنە 30 توننا دايىن ءونىم شىعارۋعا مۇمكىندىك بەرەدى.