قىتاي قازاقستانداعى اتوم ەنەرگەتيكاسى سالاسىنا نە ۇسىنا الادى

استانا. KAZINFORM - استانادا ءوتىپ جاتقان KazAtomExpo حالىقارالىق كورمەسى بارىسىندا CNNC (China National Nuclear Corporation) ەنشىلەس كاسىپورنىنىڭ باسشىسى چاو گان اتوم ەلەكتر ستانسيالارىن سالۋداعى قىتايلىق تەحنولوگيانىڭ ارتىقشىلىعىن ءتۇسىندىردى.

بۇل رەتتە ول قىتاي جاعى يادرولىق تەحنولوگيا سالاسىنداعى جەتىستىكتەرىن كورسەتۋگە جانە ا ە س سالۋ تەحنولوگيالارىن بەرۋگە دايىن ەكەنىن اتاپ ءوتتى.

ونىڭ ايتۋىنشا، قىتايلىق كومپانيا قازاقستانعا اتوم ەنەرگەتيكاسىن دامىتۋدىڭ جەكە باعدارلاماسى بويىنشا كومەكتەسۋگە ءازىر.

«بۇل باعدارلاما يادرولىق سالاداعى كادرلاردى دامىتۋعا باعىتتالۋى كەرەك. ونىڭ اياسىندا قازاقستان بولاشاقتا اتوم ەلەكتر ستانسيالارىنىڭ سەنىمدى جۇمىسىن قامتاماسىز ەتە الاتىنداي ادام رەسۋرستارىن دامىتۋعا ەكپىن قويىلادى»، - دەدى ول.

قىتايلىق ا ە س جوبالاۋشىلارىنىڭ ءبىرى حۋەيسيا تسزيان قازاقستاندا HBR-1000 (يادرولىق رەاكتورلار سەرياسى) قۇرىلىسى ايتارلىقتاي ۇزاق ۋاقىتتى قاجەت ەتەدى، ياعني تەك ءبىرىنشى بلوكتىڭ قۇرىلىسىنا شامامەن 68 اي قاجەت. دەگەنمەن، كەيىنگى بولىكتەرىن سالۋعا الدەقايدا از ۋاقىت كەتەدى، ويتكەنى اتوم ەلەكتر ستانسياسىنىڭ نەگىزى دايىن بولادى.

سونىمەن بىرگە ول قىتايداعى اتوم ەلەكتر ستانسيالارىنىڭ قاۋىپسىزدىگى وتە جوعارى دەڭگەيدە ەكەنىن اتاپ ءوتتى.

ايتا كەتەيىك، كورمە اياسىنداعى بريفينگىدە ق ر ەنەرگەتيكا مينيسترلىگى اتوم ەنەرگەتيكاسى جانە ونەركاسىبى دەپارتامەنتىنىڭ ديرەكتورى عۇمار سەرعازين اتوم ەلەكتر ستانسياسىن (ا ە س) سالىپ بەرەتىن ۆەندورعا تاۋەلدى بولىپ قالماۋ ءۇشىن ءوزىمىزدىڭ مامانداردى دايارلاۋعا ەكپىن قويىلاتىنىن ايتتى.

قازاقستاندا ا ە س سالۋ ماسەلەسىنە ارنالعان رەسپۋبليكالىق رەفەرەندۋم تۋرالى پرەزيدەنت جارلىعىنىڭ جوباسى ۇكىمەت قاراۋىنا جىبەرىلدى.