قىتاي - قازاق استىعىنىڭ ەڭ ءىرى نارىعىنا اينالۋى مۇمكىن - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
قازاق ارمياسى - ورتالىق ازياداعى ەڭ ۇزدىك ارميا - «TRT»
جاڭا جىلدا الەمدەگى ەڭ قۋاتتى ارميالاردىڭ ءتىزىمى جاڭارتىلدى.
ا ق ش-تىڭ «Global Firepower» اسكەري ستاتيستيكالىق سايتى جاساعان رەيتينگىدە قازاقستان ارمياسى 58-ورىنعا تۇراقتادى. ءتىزىم بويىنشا قازاق اسكەرى ورتالىق ازياداعى ەڭ كۇشتى ارميا اتاندى. بۇل تۋرالى وسى اپتادا تۇركيا راديو تەلەۆيزيا پورتالى حابارلادى. تۇركيالىق باسىلىمنىڭ دەرەگىنشە، قازاقستاندىق اسكەريلەر رەيتينگىدە بەس ساتىعا كوتەرىلىپ، اسكەري قۋاتتىلىق رەيتينگىندە 58-ورىنعا ورنالاستى.
2023 -جىلى قازاقستان ارمياسى 63-شى ورىندا بولاتىن. قازاقستان ارمياسىنىڭ قورعانىس شىعىندارى 7,5 ميلليارد ا ق ش دوللارىن قۇرادى. اسكەري قىزمەتكەرلەردىڭ جالپى سانى 300 مىڭ ادامعا جەتتى.
«تىزىمدە وزبەكستان 65-شى، قىرعىزستان 100-شى، تاجىكستان 107-شى ورىندا تۇر. رەيتينگىدە ساراپشىلار 145 ەلدى اسكەري بولىمدەردىڭ سانى، قارجىلىق جاعداي، تەحنولوگيالىق دامۋ، گەوگرافيالىق ورنالاسۋى جانە موبيلدىلىك سياقتى 60 ءتۇرلى فاكتور بويىنشا باعالادى»، - دەپ جازادى تۇركيالىق باق.
سونىمەن قاتار «TRT» - دا «الماتى قالاسى ەڭ ۇزدىك تۋريستىك باعىتتار تىزىمىنە ەندى» دەگەن تاقىرىپتاعى اقپارات جارىق كوردى.
«New York Times» گازەتى الماتى قالاسىن ەڭ ۇزدىك تۋريستىك باعىتتار تىزىمىنە ەنگىزگەن. «The New York Times» بيىل، 2024 -جىلدا كورۋگە بولاتىن الەمدەگى 52 ورىننىڭ ءداستۇرلى ءتىزىمىن جاريالادى. قر تۋريزم جانە سپورت مينيسترلىگىنىڭ حابارىنا قاراعاندا، تانىمال باسىلىمنىڭ نۇسقاسى بويىنشا الماتى تىزىمدە 25-ورىندا تۇر.
«الماتى قازاقستاننىڭ ەكى ميلليون حالقى بار ەڭ ءىرى قالاسى بولسا دا، تىنىش، ءبىراق بەلسەندى قالا اسەرىن قالدىرادى. الماتىنىڭ مادەني ورتالىق رەتىندەگى مارتەبەسى ونىڭ گاسترونوميالىق تۇرمىسىندا ايقىن كورىنەدى. ۇن، سۋ جانە ەتكە نەگىزدەلگەن «نەو- نومادتار» اسحاناسى گيپەر- زاماناۋي ستيلدە ۇسىنىلادى. كوك بازارداعى جەمىستەر مەن جاڭعاقتاردى كورىڭىز»، - دەپ جازىلعان «New York Times» ماقالاسىندا.
ماقالادا الماتىنىڭ فوتوسۋرەتى دە جاريالانعان.
قىتاي - قازاق استىعىنىڭ ەڭ ءىرى نارىعىنا اينالۋى مۇمكىن - «حالىق گازەتى»
رەسمي مالىمەت بويىنشا بىلتىر قازاقستاننان قىتايعا تەمىرجولمەن 2 ميلليون 226 مىڭ توننا اۋىل شارۋاشىلىعى ونىمدەرى جەتكىزىلگەن.
بۇل تۋرالى وسى اپتادا قىتايدىڭ «حالىق گازەتى» قازاقستاندىق «Inbusiness.kz»-كە سىلتەمە جاساپ حابارلادى.
«سالىستىرساق، 2022 -جىل قورىتىندىسىندا بۇل كورسەتكىش نەبارى 615 مىڭ توننانى قۇراعان بولاتىن. بۇل - جاڭا رەكورد سانالادى. الدىڭعى ەڭ جوعارعى كورسەتكىش سوناۋ 2019 -جىلى تىركەلگەن. سوندا قىتايعا 1,2 ميلليون توننا اۋىل شارۋاشىلىعى ءونىمىن وتكىزگەن بولاتىن»، - دەپ جازادى قىتايلىق ب ا ق.
وزبەكستان وكىلى الەمدەگى 100 ساۋلەتشى ايەلدىڭ قاتارىنا ەندى - «ءوز ا»
وزبەكستاندىق ساۋلەتشى تاحمينا تۋردياليەۆا بريتان ساۋلەتشىلەرىنىڭ كورولدىك ينستيتۋتى (RIBA) شىعارعان الەمنىڭ 100 ايەل ساۋلەتشىسى تۋرالى كىتاپقا ەندى.
بۇل تۋرالى وزبەكستاندىق «ءوز ا» اقپاراتتىق اگەنتتىگى حابارلادى.
اتالعان ب ا ق-تىڭ دەرەگىنشە، وسى جىلدىڭ 23-قاڭتارىندا لوندوندا «100 women architects in practice» دەپ اتالاتىن كىتاپتىڭ رەسمي تۇساۋكەسەرى وتەدى. «RIBA» باسىپ شىعارعان بۇل كىتاپ ايەلدەردىڭ ساۋلەت ونەرىنە قوسقان ۇلەسىن زاڭدى تۇردە مويىنداپ بۇكىل الەمدەگى ايەل ساۋلەتشىلەردىڭ الۋان ءتۇرلى جانە قىزىقتى جۇمىستارى تۋرالى اقپارات بەرەدى.
بريتاندىق باسىلىم تاحمينا تۋردياليەۆانىڭ جوباسى تاشكەنت قالاسىنداعى سىبايلاس جەمقورلىققا قارسى ءىس-قيمىل اگەنتتىگىنىڭ شوتا رۋستاۆەلي كوشەسىندەگى اكىمشىلىك عيماراتى مەن زاماناۋي ونەر ورتالىعىنداعى ساياجاي اۋلاسىنىڭ كولەڭكەلى قۇرىلىسى تۋرالى مالىمەتتەردى جاريالاعان.
سونداي-اق، وسى اپتادا «ءوز ا» اقپاراتتىق اگەنتتىگىندە «قازاقستان مەن وزبەكستان 2024 -جىلعا جوسپارلانعان بىرلەسكەن ءىس-شارالاردى تالقىلادى» دەگەن تاقىرىپتاعى اقپارات جاريالاندى.
«ءوز ا»-نىڭ مالىمەتىنشە، وزبەكستان س ءى م باسشىسىنىڭ ورىنباسارى مەن قازاقستان ەلشىسى 2024 -جىلعا جوسپارلانعان بىرلەسكەن ءىس-شارالاردىڭ كەستەسى مەن ۇيىمداستىرۋشىلىق اسپەكتىلەرىن تالقىلاعان.
وزبەكستان سىرتقى ىستەر ءمينيسترىنىڭ ورىنباسارى راحماتۋللا نۋريمبەتوۆ قازاقستاننىڭ وزبەكستانداعى توتەنشە جانە وكىلەتتى ەلشىسى بەيبىت اتامقۇلوۆپەن كەزدەسكەن. كەزدەسۋدە تاراپتار ىنتىماقتاستىقتىڭ باسىم باعىتتارى بويىنشا ەلدەر اراسىنداعى پراكتيكالىق ىنتىماقتاستىقتى ودان ءارى نىعايتۋ پەرسپەكتيۆالارىن تالقىلاعان.
شىڭجاڭدىق قازاقتىڭ مۇيىزدەن جاساعان مۇسىنىنە قىتاي حالقى تاڭدانىپ جاتىر - «Harajorga»
شىنجاڭدىق قازاق ۇلۋ جىلىنىڭ كەلۋىنە وراي ايداھاردىڭ ءمۇسىنىن جاساپ شىقتى. ءبىر ەرەكشەلىگى، بۇل ايداھاردىڭ سىرتقى قابىرشاعى، مۇرتى، ءمۇيىزى سياقتى دەنە بولشەكتەرى مۇيىزدەن جاسالعان، دەپ جازادى «Harajorga».
قىتايلىق ب ا ق-تىڭ حابارلاۋىنشا، شەبەر بۇل تۋىندىسىنىڭ ۆيدەوسىن ءوزىنىڭ جەكە پاراقشاسىندا جاريالاعان. ۆيدەو الەۋمەتتىك جەلى قولدانۋشىلارىنىڭ تاڭدانىسىن تۋدىرعان.
جەلى وقىرماندارى «ناعىز شەبەر حالىق اراسىندا بولادى» دەگەن سەكىلدى پىكىرلەر جازعان.
سونىمەن قاتار، بۇل قانداسىمىزدىڭ جانۋارلاردىڭ مۇيىزىنەن جاساعان دالا مادەنيەتىنىڭ سالت- ءداستۇر قيمىلىن بەينەلەيتىن «بۇعالىقپەن ات ۇستاۋ» سياقتى باسقا دا كوپتەگەن تۋىندىلارى بار ەكەن.
توقتاربەك قىتايدىڭ ۇزدىك سپورتشىسى تىزىمىنە ەندى - CNR
قىتايدىڭ مەملەكەتتىك سپورت جانە دەنە شىنىقتىرۋ باس باسقارماسىنىڭ كادرلار مەكەمەسى حاڭجوۋدا وتكەن XIX ازيا ويىندارى جانە IV ازيا پارا ويىندارىنداعى ۇزدىك توپتار مەن ەڭ ۇزدىك سپورتشىلاردىڭ ءتىزىمىن جاريالادى. بۇل تۋرالى قىتايدىڭ «ورتالىق حالىق راديوسى» حابارلادى.
مەملەكەتتىك باس باسقارمانىڭ قويعان تالاپتارىنا ساي حاڭجوۋدا وتكەن XIX ازيا ويىندارى جانە IV ازيا پارا ويىندارىنداعى 96 توپ جانە 144 جەكە ازامات ۇزدىك سپورتشى تىزىمىنە ەندى. سول ۇزدىك جەكە سپورتشىلاردىڭ ىشىندە شىڭجاڭنان ەكى سپورتشى تاڭداپ الىنعان. ونىڭ ءبىرى قانداسىمىز، قىتايلىق بوكسشى - توقتاربەك تاڭاتقان ۇلى.
اتاپ ايتقاندا، شىڭجاڭ ولكەلىك دەنە شىنىقتىرۋ مەكەمەسى بوكس سپورتىن باسقارۋ ورتالىعىنىڭ سپورتشىسى - توقتاربەك تاڭاتقان ۇلى، سونداي-اق شىڭجاڭ ولكەلىك دەنە شىنىقتىرۋ مەكەمەسى دەنە شىنىقتىرۋ №1-كومانداسىنىڭ سپورتشىسى - ابدۋحالىقجان ءمۇتالىپ.
التاي جارتاس سۇلبا سۋرەتتەرى تۋرالى سۇحبات - Janadauir.com
وسى اپتادا «Janadauir.com» سايتىنداموڭعوليانىڭ مادەنيەت مينيسترلىگىنە قاراستى موڭعول التاي جارتاس سۇلبا سۋرەتتەرىنىڭ كەشەندى قورىق اكىمشىلىگىنىڭ ديرەكتورى تاريح عىلىمىنىڭ دوكتورى ومىربەك ءبيقۇمار ۇلىنان العان سۇحبات جاريالاندى.
«ايماعىمىزداعى تاريحي ماڭىزى اسا جوعارى قايتالانباس دۇنيەلەردىڭ ءبىرى - التاي سۇلبا سۋرەتتەرى مەن كىسى تاستار. بۇل مۇرالار ادام بالاسىنىڭ نانىم- سەنىمى پايدا بولىپ، ءارتۇرلى قۇرال- سايماندار جاساپ ۇيرەنگەن تۇستاعى ياعني كونە ءداۋىردىڭ قولجازباسى ىسپەتتى. سوڭعى جىلدارى ادامداردىڭ تەرىس ءىس- ارەكەتتەرىنىڭ سالدارىنان بۇل جازبالار ءبۇلىنىپ، جويىلۋ پروتسەسى جۇرىلە باستادى. سوندىقتان دا ارنايى اكىمشىلىك ورناپ بۇل جازبالاردى ساقتاۋعا مۇمكىندىك تۋدى. 2023 -جىلى اتالمىش زەرتتەۋ كەشەنىنەن جارىق كورگەن الەمدىك مۇرا «ساگاان سالاا - باگا ويگارىن حادنى زۋراگ» كىتابى ا ا ءو ق-نىڭ ءتوراعاسى ءشارىپ ۇلى قابىلدىڭ شەشىمىمەن قوعام قايراتكەرى، دوكتور، پروفەسسور قۇرمەتبەك بايتازا ۇلى اتىنداعى سىيلىقتى جەڭىپ الدى. وسى جانە وزگە دە ماسەلەلەر تۋرالى ايماقتىق موڭعول التاي جارتاس سۇلبا سۋرەتتەرى كەشەندى قورىق اكىمشىلىگىنىڭ باستىعى ومىربەك بيقۇمار ۇلىمەن سۇحبات وربىتتىك»، - دەپ جازادى موڭعوليالىق Janadauir.com سايتى.
سۇحباتتا جارتاس سۇلبا سۋرەتتەرىنە قاتىستى جانە باسقادا ماڭىزدى سۇراقتارعا قورىق ديرەكتورى، تاريح عىلىمىنىڭ دوكتورى ومىربەك ءبيقۇمار ۇلى جاۋاپ بەرگەن.
قازاقستان اقتاۋ پورتىنىڭ استىقتى تيەۋ جانە ەكسپورتتاۋ قۋاتتىلىعىن ارتتىرادى - Parstoday
قازاقستان بيىل اقتاۋ پورتىنىڭ تەرمينالى ارقىلى كورشىلەس ەلدەر مەن وڭىرگە استىق ەكسپورتىن ارتتىرۋدى جوسپارلاپ وتىر، دەپ حابارلايدى «Parstoday» اقپارات اگەنتتىگى.
يراندىق ب ا ق-تىڭ كەلتىرگەن مالىمەتتەرىنە سۇيەنسەك، قازاقستان اقتاۋ پورتى تەرمينالى ارقىلى يرانعا استىق ەكسپورتىن ارتتىرادى. «اق بيداي» استىق تەرمينالى بيىل 400 مىڭ توننا استىق وتكىزۋدى جوسپارلاپ وتىر. تەرمينالدىڭ ونىمدىلىگى ساعاتىنا 350 تونناعا دەيىن. بۇل ونىڭ تاۋلىگىنە 3000 تونناعا دەيىن قابىلداپ، كەمەلەرگە 4000 تونناعا دەيىن استىق جىبەرە الاتىنىن بىلدىرەدى. بۇل سوما وتكەن جىلعى تاسىمالداۋ كولەمىنەن 3,2 ەسەگە ارتىق.
«تەھرانمەن جاسالعان ازىق-تۇلىك سالاسىنداعى ىنتىماقتاستىق كەلىسىمى مەن قۇجاتىنا سايكەس، وسى تەرمينالدان يرانعا نەبارى 15 توننا 779 كەلى بيداي، 106 توننا 714 ارپا جانە 3 توننا 348 كەلى جۇگەرى جونەلتىلگەن. بۇل ەسەپتە 2024 -جىلدىڭ قاڭتارىنا بۇل جۇك تەرمينالى 18 توننا 800 ك گ استىق تاسىمالداۋعا كەلىسكەنى اتاپ وتىلگەن»، - دەپ جازادى «Parstoday».
قانداستارىمىز قار مۇسىندەرى حالىقارالىق بايقاۋىندا جۇلدەلى ورىنعا يە بولدى - Ukilialtay
قىتايدىڭ حاربين قالاسىندا وتكەن قىتاي - حاربين حالىقارالىق قاردان جاسالعان ۇزدىك مۇسىندەردىڭ بايقاۋىندا التاي كومانداسى «ايەل. ءومىر» دەپ اتالاتىن تۋىندىسىمەن 3-ورىندى ەنشىلەدى، دەپ حابارلايدى قىتايدىڭ Ukilialtay اقپاراتتىق پورتالى.
بۇل بايقاۋعا رەسەي، كانادا، يسپانيا، وڭتۇستىك كورەيا، ءۇندىستان جانە موڭعوليا قاتارلى 12 ەلدەن بارلىعى 29 كوماندا قاتىستى. جۇزدەن استام قاردان ءمۇسىن جاساۋشى شەبەر ءتورت كۇندىك فيلوسوفيالىق كونتسەپتسيالار، ۇلتتىق مادەنيەت، گۋمانيستىك ادەت- عۇرىپ، ايماقتىق ەرەكشەلىكتەر جانە ت. ب. نەگىزدەلگەن كوركەم شىعارماشىلىق قاردان جاسالعان ءمۇسىن جۇمىستارىن ۇسىندى. باس جۇلدەنى وڭتۇستىك كورەيادان كەلگەن كوماندا جەڭىپ الدى.
قىتايلىق ب ا ق-تىڭ كەلتىرگەن دەرەگىنە سۇيەنسەك، قىتايدىڭ حاربين حالىقارالىق قار مۇسىندەرى بايقاۋىنىڭ نەگىزى 1996 -جىلى قالانعان. بۇل - حاربين حالىقارالىق مۇز جانە قار فەستيۆالىنىڭ ماڭىزدى شارالارىنىڭ ءبىرى. سونىمەن قاتار الەمدەگى ەڭ ۇلكەن جانە ەڭ ىقپالدى مۇز بەن قار مۇسىندەرىنىڭ بايقاۋى بولىپ سانالادى. اتالعان بايقاۋ قازىرگە دەيىن 26 رەت وتكىزىلگەن.
بايقاۋعا قاتىسقان التاي كومانداسى قۇرامىندا يۋان ۆەنيۋ، جۇماجان بەشەن ۇلى، سەرىك باتىڭ، بادەلحان ءجانىمحان سياقتى ءتورت ادام بار.
ايتا كەتەيىك، كوماندانىڭ باس ءمۇسىنشىسى جۇماجان بەشەن ۇلى قىتايدىڭ التاي ايماعى شىڭگىل اۋدانىندا دۇنيەگە كەلگەن كاسىبي سۋرەتشى. شىڭجاڭ پەداگوگيكالىق ۋنيۆەرسيتەتىنىڭ بەينەلەۋ ونەرى ينستيتۋتىنىڭ بەينەلەۋ ونەرى ماماندىعى بويىنشا بىتىرگەن. شىڭجاڭ جانە التاي سۋرەتشىلەر وداعىنىڭ مۇشەسى.
اۆتور
بەيسەن سۇلتان ۇلى