سوڭعى جىلدارى قىتاي بۇل باعىتتاعى زەرتتەۋلەردى ايتارلىقتاي جەدەلدەتتى. وتكەن جىلدان باستاپ ءبىرقاتار ازىرلەمەلەر زەرتحانالىق سىناق كەزەڭىنەن پراكتيكالىق قولدانۋعا ءوتىپ، ناۋقاستاردى ەمدەۋدە ناقتى ناتيجەلەر كورسەتە باستادى.
ەڭ ەلەۋلى جەتىستىكتەردىڭ ءبىرى - وتاندىق «بەيناو-1» جانە «بەيناو-2» جۇيەلەرى. مامانداردىڭ ايتۋىنشا، جارتىلاي ينۆازيۆتى «بەيناو-1» جۇيەسى جەتى پاتسيەنتكە يمپلانتاتسيالانعان. ولاردىڭ بارلىعى وڭالتۋ كەزەڭىنەن ءساتتى ءوتىپ، قوزعالىس جانە سويلەۋ فۋنكتسيالارىن قالپىنا كەلتىرە العان. ال «بەيناو-2» جاقىن ۋاقىتتا كلينيكالىق سىناق كەزەڭىنە وتەدى دەپ كۇتىلىپ وتىر.
«مي- كومپيۋتەر» ينتەرفەيسى ادامنىڭ ميى مەن سىرتقى قۇرىلعىلار اراسىندا تىكەلەي بايلانىس ورناتۋعا مۇمكىندىك بەرەدى. مي سيگنالدارىن وقىپ، ولاردى ينتەرپرەتاتسيالاۋ ارقىلى مۇنداي جۇيەلەر پاتسيەنتتەرگە پروتەزدەردى، كومپيۋتەرلەردى جانە باسقا دا كومەكشى تەحنولوگيالاردى باسقارۋعا جول اشادى. بۇل اسىرەسە اۋىر قوزعالىس بۇزىلىستارى بار ادامدار ءۇشىن اسا ماڭىزدى.
م ك ي تەحنولوگيالارىن دامىتۋ مەملەكەتتىك دەڭگەيدە بەلسەندى قولداۋ تاۋىپ وتىر. ول «ەكى سەسسيا» اياسىندا باسىم باعىتتاردىڭ قاتارىنا ەنگىزىلىپ، بولاشاقتىڭ سالاسى رەتىندە بەلگىلەندى. سونىمەن قاتار ينفراقۇرىلىم دا كەڭەيىپ كەلەدى: بەيجىڭ، تيانجين، گۋاڭجۋ، ۋحان جانە نانكين قالالارىندا ارنايى كلينيكالار مەن زەرتتەۋ ورتالىقتارى اشىلىپ جاتىر.
ماڭىزدى قادامداردىڭ ءبىرى - مويىن ومىرتقاسى جاراقاتىنان تۋىنداعان تەتراپلەگياسى بار ناۋقاستارعا ارنالعان مكي نەگىزىندەگى الەمدەگى العاشقى ينۆازيۆتى مەديتسينالىق قۇرىلعىنىڭ ماقۇلدانۋى. بۇل قۇرىلعى قول مەن ساۋساقتاردىڭ فۋنكتسيالارىن ءىشىنارا قالپىنا كەلتىرۋگە مۇمكىندىك بەرەدى.
مۇنداي تەحنولوگيالاردىڭ وزەكتىلىگى ماسەلەنىڭ اۋقىمىمەن تۇسىندىرىلەدى. مامانداردىڭ دەرەگىنشە، قىتايدا جۇلىن جاراقاتىمەن اۋىراتىن ناۋقاستاردىڭ سانى 3,7 ميلليوننان اسادى. سونىمەن قاتار مكي پاركينسون اۋرۋىن، ەپيلەپسيانى، ءينسۋلتتى جانە بۇيىرلىك اميوتروفيالىق سكلەروزدى ەمدەۋدە پەرسپەكتيۆالى شەشىم رەتىندە قاراستىرىلىپ وتىر.
پاراللەل تۇردە يندۋستريالىق ەكوجۇيە دە دامىپ كەلەدى. بەيجىڭنىڭ حايديان اۋدانىندا بۇل سالادا جۇمىس ىستەيتىن ونداعان كومپانيا شوعىرلانعان. بيلىك 2030 -جىلعا قاراي شامامەن 100 يننوۆاتسيالىق كاسىپورىندى تارتۋدى جانە مكي تەحنولوگيالارىن مەديتسينادا، ءبىلىم بەرۋدە جانە ونەركاسىپتە كەڭىنەن قولدانۋدى جوسپارلاپ وتىر.
سونىمەن قاتار ساراپشىلار ءبىرقاتار ماسەلەلەردىڭ ءالى دە وزەكتى ەكەنىن اتاپ وتەدى. اتاپ ايتقاندا، تەحنولوگيالاردىڭ سەنىمدىلىگى، قاۋىپسىزدىگى جانە ەتيكا ماسەلەلەرى باستى نازاردا قالىپ وتىر. مامانداردىڭ پىكىرىنشە، ودان ءارى دامۋ ءۇشىن تەك تەحنولوگيالىق سەرپىلىس قانا ەمەس، سونىمەن بىرگە كادر دايارلاۋ، ستاندارتتاۋ جانە تۇراقتى يندۋستريالىق بازانى قالىپتاستىرۋدى قامتيتىن تولىققاندى ەكوجۇيە قاجەت.
جالپى العاندا، قىتاي م ك ي تەحنولوگيالارىن نيەۆرولوگيالىق اۋرۋلاردى ەمدەۋ تاسىلدەرىن وزگەرتە الاتىن جانە ادام مەن تەحنولوگيا اراسىنداعى ءوزارا ارەكەتتەستىكتى جاڭا دەڭگەيگە شىعاراتىن ستراتەگيالىق باعىت رەتىندە قاراستىرىپ وتىر.
ەسكە سالا كەتسەك، جۋىردا قىتاي 2025 -جىلعى باستى عىلىمي جەتىستىكتەرىن جاريالادى.