قىتاي مەن ورتالىق ازيادان ەۋروپاعا جەتكىزىلەتىن جۇكتىڭ 80 پايىزى قازاقستان ارقىلى وتەدى - ساراپشى

استانا. KAZINFORM - كاسپي ساياسات ورتالىعىنىڭ ديرەكتورى افگان نيفتيەۆتىڭ ايتۋىنشا، ەۋروپا ەلدەرى قازاقستان ارقىلى ترانزيت كولەمىن ارتتىرۋعا مۇددەلى. بۇل تۋپالى ول «Astana Think Tank» حالىقارالىق فورۋمىندا ءمالىم ەتتى.

«ويتكەنى ەۋروپا ءبىزدىڭ مينەرالدى رەسۋرستارعا مۇقتاج. قازىر قۇرلىق اراسىندا بيدايدان باستاپ، سيرەك كەزدەسەتىن مەتالدارعا دەيىن تاسىمالدانىپ جاتىر. بىلتىر ءوزارا تاۋار اينالىمى 41 ميلليارد دوللارعا جەتتى. الىس- بەرىستى ودان ءارى ارتتىرۋ ءۇشىن جاڭا تەرمينالداردى كوبەيتۋ كەرەك. بۇل جۇك جەتكىزۋ مەرزىمىن قىسقارتىپ، جاڭا نارىقتارعا جول اشادى»، - دەيدى ساراپشى.

ونىڭ پىكىرىنشە، قازىر قىتاي مەن ورتالىق ازيادان ەۋروپاعا جەتكىزىلەتىن جۇكتىڭ 80 پايىزدان استامى قازاقستان ارقىلى وتەدى. الدا بىرنەشە تەرمينال سالىنباقشى. بۇل قازاقستاننىڭ لوگيستيكالىق الەۋەتىن ارتتىرىپ، ترانزيتتىك حابقا اينالۋىنا مۇمكىندىك بەرەدى

جالپى، فورۋمعا الىس-جاقىن شەتەلدەردەن 45 تەن استام ساراپشى قاتىستى. ەكى كۇنگە جالعاساتىن ءىس-شارادا حالىقارالىق اناليتيكالىق ورتالىقتار ءبىرقاتار مەموراندۋمعا قول قويماق. ماسەلەن، بۇگىن قازاقستان ستراتەگيالىق زەرتتەۋلەر ينستيتۋتى مەن يراننىڭ باس ساراپشى ورتالىعى كەلىسىم جاسادى. ماقسات - ساۋدا- ەكونوميكالىق ىقپالداستىقتى كەڭەيتۋ ماسەلەلەرىن زەردەلەۋ، قانداي جوبالاردى بىرلەسىپ ىسكە اسىرۋ ءتيىمدى بولاتىنىن باعامداۋ.