قىتاي مەن قازاقستان اراسىندا جاڭا تۋريستىك باعىت اشىلادى

استانا. قازاقپارات - 29 - مامىردا شيان قالاسىنان «شيان - الماتى» باعىتىنداعى العاشقى تۋريستىك پويىز جولعا شىعادى. بۇل باستاما «ورتالىق ازيا - قىتاي» II سامميتى اياسىندا ۇيىمداستىرىلدى.

ق ر تۋريزم جانە سپورت مينيسترلىگى باسپاءسوز قىزمەتىنىڭ حابارلاۋىنشا، پويىز الماتىعا 31-مامىردا جەتەدى دەپ جوسپارلانعان. قوناقتار ەلىمىزدىڭ وڭتۇستىك استاناسىندا 5 كۇن بولادى. دەلەگاتسيا قۇرامىندا 250 دەن استام ادام بار: مەملەكەتتىك ورگانداردىڭ، بيزنەس، عىلىم، مادەنيەت، مەديتسينا جانە سپورت سالاسىنىڭ وكىلدەرى مەن تۋريستەر. بۇل ساپاردى سيان قالاسى اكىمىنىڭ ورىنباسارى شياو شي باستاپ كەلەدى.

قوناقتار ءۇشىن ارنايى مادەني جانە ىسكەرلىك باعدارلاما دايىندالعان:

- رەسمي قارسى الۋ ءراسىمى؛

- «شانشي - الماتى» اپتالىعىنىڭ اشىلۋى؛

- جارمەڭكەلەر، سيمپوزيۋمدار مەن ىسكەرلىك كەزدەسۋلەر؛

- الماتىنىڭ كورىكتى جەرلەرىنە ەكسكۋرسيالار.

تۋريستىك پويىزدىڭ كەرى باعىتتاعى ساپارى 5 - ماۋسىمعا جوسپارلانعان.

بۇل جوبا قىتاي حالىق رەسپۋبليكاسىنىڭ مەملەكەتتىك دامۋ جانە رەفورمالار كوميتەتىنىڭ باستاماسىمەن، ق ر تۋريزم جانە سپورت مينيسترلىگى، «Kazakh Tourism» ۇلتتىق كومپانياسى، «قازاقستان تەمىر جولى» ۇلتتىق كومپانياسى، سىرتقى ىستەر مينيسترلىگى، كولىك مينيسترلىگى، شەكارا قىزمەتى، ىشكى ىستەر مينيسترلىگى، الماتى قالاسىنىڭ تۋريزم باسقارماسى جانە وتاندىق تۋروپەراتورلاردىڭ قولداۋىمەن جۇزەگە اسىرىلىپ وتىر.