قىتاي ەل تاريحىنداعى ەڭ قىمبات سۋ ارناسىن سالماق

استانا. KAZINFORM - قىتاي بەيجىڭ مەن گۋاڭجوۋ قالالارىن بايلانىستىراتىن كانالدىڭ قۇرىلىسىنا دايىندالىپ جاتىر، دەپ حابارلايدى RFI حالىقارالىق راديوسى.

جوسپارداعى جياڭشي- گۋاڭدۋڭ كانالى قىتايدىڭ چاڭجياڭ جانە جۋجياڭ وزەندەرىن جالعايتىن سۋ ارناسى. ول سولتۇستىكتە جيۋجياڭ قالاسىنىڭ ىرگەسىندەگى پويانحۋ كولىنەن باستالىپ، گانجياڭ وزەنىنىڭ ارناسى ارقىلى نانچان، جيان، ۆانان، گاڭجوۋ قالالارىنىڭ اۋماعىنان وتەدى. ارى قاراي تاوجيان سۋ ايرىعىن كەسىپ ءوتىپ، گۋاڭدۋڭ پروۆينتسياسىنىڭ جەرىنە كىرگەن سوڭ جەنشۋي وزەنىنىڭ بويىمەن نانسيۋن، شاوگۋان قالالارىن باسىپ ءوتىپ، گۋاڭجوۋ قالاسىنداعى جۋجياڭ ساعاسىنا قوسىلادى.

جياڭشي- گۋاڭدۋڭ كانالىنىڭ جالپى ۇزىندىعى - 1237 شاقىرىم. ول گۋاڭدۋڭ، جياڭشي جانە جىجياڭ پروۆينتسيالارىن بايلانىستىراتىن ءىرى سۋ كولىگى جوباسىنىڭ ءبىر بولىگى. جوبا ءساتتى اياقتالسا، اتالعان ءۇش پروۆينتسيا ارقىلى وتەتىن جاڭا سۋ جولى الەمگە ايگىلى ۇلى قىتاي كانالىمەن تۇتاسىپ، ەلدەگى ەكى ءىرى سۋ جۇيەسى - چاڭجياڭ مەن جۋجياڭ وزەندەرى ءوزارا بايلانىسادى. ناتيجەسىندە قىتايدى سولتۇستىكتەن وڭتۇستىككە قاراي كوكتەي وتكەن جاڭا سۋ ارناسى پايدا بولىپ، گۋاڭجوۋدان بەيجىڭگە دەيىنگى سۋ قاتىناسى ىسكە اسىرىلادى.

RFI-دىڭ جازۋىنشا، كانالدىڭ جالپى قۇنى 320 ميلليارد يۋان (شامامەن 44,4 ميلليارد ا ق ش دوللارى). بۇل جوبا قىتاي تاريحىنداعى قۇنى ەڭ قىمبات جاساندى سۋ ارناسى بولۋى مۇمكىن. جوبانىڭ بولجامدى شىعىندارى گونكونگ- جۋحاي- ماكاو كوپىرىنەن ءۇش ەسە كوپ.

جىجياڭ- جياڭشي- گۋاڭدۋڭ سۋ ارناسى «كەشەندى كولىك جەلىسىن دامىتۋدىڭ ۇلتتىق جوسپارى (2021- 2035)» مەن «ىشكى سۋ كولىگى ينفراقۇرىلىمىن دامىتۋ باعدارلاماسىنا» ەنگىزىلگەن. قازىر جوبانىڭ تەحنيكالىق- ەكونوميكالىق نەگىزدەمەسى ازىرلەنىپ جاتىر، ال قۇرىلىس جۇمىستارى «ون ءتورتىنشى بەسجىلدىق» اياسىندا باستالادى دەپ جوسپارلانعان.

قىتايدىڭ كولىك مينيسترلىگىنىڭ مالىمەتىنشە، كانالدا 1000 تونناعا دەيىنگى جۇك كەمەلەرى ەركىن جۇزە الادى. كانالدىڭ جىلدىق جۇك وتكىزۋ كولەمى شامامەن 25 ميلليون تونناعا جەتۋگە ءتيىس.

RFI- ءدىڭ مالىمەتىنشە، بۇل جوبا سونداي-اق قىتاي ۇكىمەتىنىڭ 2035 -جىلعا دەيىن ەلدەگى ىشكى سۋ كولىگى جەلىسىنىڭ جالپى ۇزىندىعىن 25000 شاقىرىمعا جەتكىزۋ جونىندەگى اۋقىمدى ستراتەگيالىق جوسپارىنىڭ ءبىر بولىگى.

اۆتور

ەرلان مازان