قىتاي ەكىنشى دۇنيەجۇزىلىك سوعىستىڭ اياقتالۋىنىڭ 80 جىلدىعىنا وراي اسكەري شەرۋ وتكىزەدى
استانا، KAZINFORM - قىتاي بيلىگى سەيسەنبى كۇنى (24 -ماۋسىم) 3 - قىركۇيەكتە پەكيندە جاپونعا قارسى سوعىستا جانە الەمدىك فاشيزمگە قارسى سوعىستا جەڭىسكە جەتۋىنىڭ 80 جىلدىعىنا ارنالعان سالتاناتتى جيىن، سونىڭ ىشىندە تيانانمەن الاڭىندا اۋقىمدى اسكەري شەرۋ وتكىزەتىنىن جاريالادى.
شينحۋا اقپارات اگەنتتىگىنىڭ حابارلاۋىنشا، قىتاي ورتالىق اسكەري كوميسسياسى بىرىككەن جاۋىنگەرلىك ءبولىمنىڭ جاۋىنگەرلىك بيۋرو باسشىسىنىڭ ورىنباسارى، گەنەرال-مايور ۋ زەكە سەيسەنبى كۇنگى باسپا ءسوز ءماسليحاتىندا شارانىڭ جوسپارىن تانىستىردى. ول قىتاي ءتوراعاسى شي جينپيڭنىڭ 3 - قىركۇيەكتە تيانانمەن الاڭىندا اسكەري شەرۋگە ءتوراعالىق ەتەتىنىن مالىمدەدى.
ۋ زەكەنىڭ ايتۋىنشا، شەرۋ جاياۋ اسكەر بولىمدەرى، اسكەري تەحنيكا، اۋە كۇشتەرىنىڭ ۇشاقتارى جانە ءبىرقاتار وزىق جاۋىنگەرلىك تەحنيكالاردىڭ كورسەتىلىمىن قامتيدى.
شينحۋا حابارلاۋىنشا، شەرۋ بارىسىندا «ينتەللەكتۋالدى جانە ۇشقىشسىز جابدىقتاردى قوسا العاندا، ءبىرقاتار جاڭا جاۋىنگەرلىك كۇشتەر» كورسەتىلەدى. رەسمي تۇردە ناقتى قانداي وزىق قارۋ- جاراقتاردىڭ كورسەتىلەتىنى حابارلانباعانىمەن، شەرۋگە قاتىساتىن بارلىق تەحنيكانىڭ قىتاي ءوز كۇشىمەن وندىرگەنىن جانە «بولاشاق سوعىستارعا» ارنالعان جوعارى تەحنولوگيالى قارۋ ەكەنى ايتىلدى.
گەنەرال- مايور ۋ زەكە شەرۋ تاقىرىبىنىڭ «ۇلى جەڭىستى ەسكە الۋ جانە ۇلى سوعىس رۋحىن دارىپتەۋ» ەكەنىن اتاپ ءوتتى. بۇل شارا «شي جينپيڭ جولداس باسقاراتىن ورتالىق پارتيا كوميتەتىنىڭ توڭىرەگىندە بۇكىل پارتيانى، ارميانى جانە قىتايدىڭ ءار ۇلتىنىڭ حالقىن تىعىز بىرىكتىرۋگە شابىتتاندىرۋدى»، سونداي-اق كۇشتى مەملەكەت قۇرۋدى جانە قىتاي ۇلتىنىڭ ۇلى ورلەۋىن جۇزەگە اسىرۋدى كوزدەيدى.
قىتاي تاراپى قازىرگى ۋاقىتتا «ءتيىستى ەلدەردىڭ باسشىلارىن، بۇرىنعى ساياسي قايراتكەرلەردى، شەتەلدىك ەلشىلەردى» جانە باسقالاردى شاقىرۋدى جوسپارلاپ وتىرعانىن مالىمدەدى، ءبىراق قاي ەل باسشىلارىنىڭ شاقىرىلاتىنى تۋرالى ناقتى اقپارات بەرگەن جوق.
قىتايداعى سوڭعى اۋقىمدى اسكەري شەرۋ 2019 -جىلى ەلدىڭ قۇرىلعانىنا 70 جىل تولۋىنا وراي ۇلتتىق مەرەكە كۇنى وتكىزىلگەن بولاتىن.