قىتاي كومپانياسى اتىراۋداعى جەراستى سۋىنىڭ كوتەرىلۋ سەبەبىن زەرتتەۋى مۇمكىن

اتىراۋ. KAZINFORM - اتىراۋ قالاسىندا جەراستى سۋى كوتەرىلىپ، جەكە تۇرعىن ءۇي يەلەرىن قيىندىقتى ۇشىراتىپ وتىر.

اتىراۋ وبلىسى اكىمى سەرىك شاپكەنوۆتىڭ ايتۋىنشا، بىلتىر اتىراۋ وبلىسى مەن قىتاي حالىق رەسپۋبليكاسى اراسىنداعى سىرتقى ساۋدا اينالىمى 3 ميلليارد 242 ميلليون ا ق ش دوللارىنا جەتكەن. ونىڭ ىشىندە ەكسپورت - 3 ميلليارد 79 ميلليون، ال يمپورت 163 ميلليون ا ق ش دوللارىنا جەتتى.

قازىر وڭىردە كارىز جۇيەسىن سالۋ، جەراستى سۋىن وڭدەۋ، پايدالانۋ جانە الەۋمەتتىك نىساندار سالۋ وزەكتى ماسەلەگە اينالىپ وتىر. وبلىس اكىمى مەن «قىتاي قۇرىلىس كورپوراتسياسىنىڭ ءۇشىنشى ينجەنەرلىك بيۋروسى» كومپانياسىنىڭ باسشىسى ليۋ ميننىڭ كەزدەسۋىندە وسى ماسەلەلەرگە باسىمدىق بەرىلدى.

«ءبىز وڭىرگە ينۆەستيتسيا تارتىپ، يندۋستريانى دامىتۋعا باسىمدىق بەرىپ وتىرمىز. قىتاي - يننوۆاتسيالىق- يندۋستريالىق جوبالاردى قارقىندى وركەندەتكەن مەملەكەتتىڭ ءبىرى. ەكى ەل اراسىنداعى ىنتىماقتاستىق پەن سەرىكتەستىكتى ودان ءارى دامىتۋعا مۇمكىندىك مول. بۇل كەزدەسۋ الدا قولعا الىناتىن جوبالارعا سەرپىن بەرەدى»، - دەدى سەرىك شاپكەنوۆ.

قىتايلىق كومپانيا باسشىسى ليۋ ميننىڭ پىكىرىنشە، اتىراۋ وبلىسىندا كوتەرىلگەن جەراستى سۋىن قالىپقا كەلتىرۋ ءۇشىن درەناج جۇيەسىن سالۋ قاجەت. وسىعان وراي زەرتتەۋ جۇمىسىن جۇرگىزۋ ءۇشىن ءتيىستى ماماندار جىبەرىلەدى.

«مۇنداي ماسەلە ءبىزدىڭ شىنجىن قالاسىندا دا تۋىندادى. سول كەزدە ءبىز ءتيىستى زەرتتەۋ جۇرگىزىپ، ماسەلەنى وڭ شەشتىك. ءبىزدىڭ تاجىريبەمىز بار. تۇزدى جەردىڭ سۋىن تازالاۋ - وتە جەڭىل پروتسەسس. بۇعان ارنايى مەرزىم قاجەت. كەيىن كومپانيانىڭ ارنايى ماماندارى بەلگىلەنگەن اۋماقتارعا زەرتتەۋ جۇرگىزۋگە كەلەدى. بىرلەسە جۇمىس ىستەسەك، ەكى ەل ەكونوميكاسىن ودان ءارى وركەندەتۋگە، جەراستى سۋىنىڭ كوتەرىلۋ ماسەلەسىن شەشۋگە سەرپىن بەرەرىنە سەنەمىن»، - دەدى ليۋ مين.

ەسكە سالا كەتەلىك، بۇدان بۇرىن اتىراۋلىق عالىمدار ۇشاق پەن جولدا مۇز قاتىرمايتىن رەاگەنت جاساپ شىعارعانىن حابارلاعان ەدىك.

اۆتور

جولداسبەك شوپەعۇل