قىتاي كومپانيالارى قازاقستاننان ءبيداي ساتىپ الۋدى ۋاقىتشا توقتاتتى

  ق ر اۋىل شارۋاشىلىعى مينيسترلىگى ساپاسى تومەن استىقتى قىتايعا وتكىزۋ كەلىسسوزىنە قاتىستى تۇسىنىك بەردى، دەپ حابارلايدى Kazinform.

«كەلىسسوز ناتيجەسى قوسىمشا حابارلانادى. سونىمەن بىرگە، 2023 -جىلدىڭ باسىنان بەرى ازىق- تۇلىك كەلىسىمشارت كورپوراتسياسى قىتايعا 87 مىڭ توننا 3-سىنىپتى ءبيداي جەتكىزدى» دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

سونىمەن قاتار، COFCO Resources SA كومپانياسىمەن 75 مىڭ توننا بيداي جەتكىزۋ بويىنشا 2 كەلىسىمشارت ورىندالعان. ALASHANKOU JINSHAHE FOUR MANUFACTURING CO. , LTD كومپانياسىمەن استىق تاسىمالداۋشىلارعا 50 مىڭ توننا ءبيدايدى تيەۋ جونىندە كەلىسىم جاسالدى.

قازىر 12 مىڭ تونناسى جونەلتىلدى.

«قىتاي نارىعىندا جانە „دوستىق- الاشانكوۋ“ شەكارا وتكەلىندە استىق باعاسىنىڭ تومەندەۋىنە بايلانىستى بيداي ساتىپ الۋ ۋاقىتشا توقتاپ تۇر» دەپ اتالىپ وتكەن حابارلامادا.

بۇدان بۇرىن حابارلانعانداي، ازىق- تۇلىك كەلىسىمشارت كورپوراتسياسى قازىرگى كەزدە ساپاسى تومەن استىق پەن 5-سىنىپتى ءبيدايدى ساتىپ الۋشىلاردى بەلسەندى تۇردە ىزدەستىرىپ جاتىر.

بۇل رەتتە قازاقستان استىعىن ساتىپ الاتىن ەلدەرمەن، ياعني يران، قىتاي، وزبەكستان، ازەربايجان جانە باسقا دا ەلدەرمەن، سونداي- اق قازاقستان نارىعىنداعى ساتىپ الۋشىلارمەن (قۇس ءارى مال وسىرۋشىلەر، سپيرت زاۋىتتارى) كەلىسسوز جالعاسىپ جاتىر.

2023-جىلدىڭ اياعىندا پارلامەنت دەپۋتاتتارى قازاقستاندا فەرمەرلەر ساپاسى تومەن استىقتان شىعىنعا باتۋى مۇمكىن ەكەنىن ايتقان ەدى.

«ناقتىراق ايتساق، 5,6 ميلليون توننانىڭ (سىنىپسىز استىق) 200 مىڭىن عانا ەكسپورتتايسىزدار. مۇنىڭ وزىندە قىتاي وسى 200 مىڭ توننانى ناقتى الاتىنى بەلسىز جانە بۇل كولەم جالپى پروبلەمانى شەشپەيتىنى تۇسىنىكتى. ال قالعان 5,4 ميلليون توننانى قايدا جىبەرەمىز؟ بىرىنشىدەن، بۇل ماسەلەنى تەز ارادا شەشپەسە، تومەن ساناتتاعى وسى استىق كوكتەپ شىعادى نەمەسە كۇيىپ كەتەدى. ءبىزدىڭ ەسەپتەۋىمىزشە، بۇل ساپاسىز تومەن استىقتىڭ تونناسى 55 مىڭ تەڭگە بولسا، قازىر شارۋالاردىڭ قويمالارىندا 300 ميلليارد تەڭگەنىڭ ءونىمى جاتىر. ال ەكى ايدا ول جارامسىز بولىپ قالادى. بۇل اقشانى شارۋالارعا كىم قايتارادى»، - دەدى ءماجىلىس دەپۋتاتى سەرىك ەگىزبايەۆ.