قىتاي كومپانيالارى قازاقستاندا «جاسىل» جوبالارعا بەلسەندى ينۆەستيتسيا سالىپ جاتىر - باس كونسۋل

الماتى. KAZINFORM - قىتاي بالامالى ەنەرگيا كوزدەرى سالاسىندا الەم بويىنشا كوشباسشى. سونداي-اق قازاقستانداعى جاسىل ەنەرگەتيكا جوبالارىن جۇزەگە اسىرۋعا بەلسەنە قاتىسىپ جاتىر. بۇل تۋرالى Qazaq Invest Forum-2025 فورۋمىندا قىتايدىڭ الماتىداعى باس كونسۋلى تسزيان ۆەي ءمالىم ەتتى.

ول قىتاي مەن قازاقستان ارىپتەستىگىنىڭ ماڭىزدىلىعىن اتاپ ءوتتى.

- قىتاي مەن قازاقستان - ورتاق تاۋ مەن وزەن ارقىلى بايلانىسقان تاتۋ كورشى، ءبىر-بىرىنە جوعارى دەڭگەيدە سەنەتىن سەنىمدى دوس، تابىسقا بىرگە جەتۋگە كومەكتەسەتىن سەرىكتەستەر، - دەدى تسزيان ۆەي.

باس كونسۋل قىتاي جاڭارتىلاتىن ەنەرگيا كوزدەرى سالاسىنا الەمدەگى ەڭ ءىرى ينۆەستور ەكەنىن تىلگە تيەك ەتتى. قازاقستاندا جاسىل جوبالارعا بەلسەندى قارجى قۇيىپ جاتىر. سوڭعى بەس جىلدا قىتايدىڭ قازاقستانداعى جاسىل ەنەرگيا سەكتورىنداعى ينۆەستيتسيا كولەمى 3 ميلليارد دوللاردان استى.

قىتايدىڭ جەتەكشى كومپانيالارى ەلدەگى جاسىل ەنەرگەتيكا جوبالارىنا تىكەلەي قاتىسىپ جاتىر.

- بۇل فورۋم جاسىل دامۋ مەن ينۆەستيتسيالار ماسەلەلەرىنە ارنالعان. ءبىز ەكى ەل كاسىپورىندارى وسى الاڭدى تاجىريبە الماسۋ، جاڭا ءوزارا مۇددەلەردى انىقتاۋ جانە جاسىل ەنەرگەتيكا مەن سيفرلىق تەحنولوگيا سياقتى ماڭىزدى سالالاردا بىرلەسكەن جوبالاردى ىسكە قوسۋ ءۇشىن ءتيىمدى پايدالاناتىنىنا ۇمىتتەنەمىز، - دەدى تسزيان ۆەي.

ينۆەستيتسيالىق فورۋم اياسىندا كاپيتالى 10 ميلليارد دوللار بولاتىن Kazakh-Asia Investment Fund ترانسۇلتتىق قورىنىڭ ىسكە قوسىلۋى تۋرالى مەموراندۋمعا قول قويىلدى.

سونىمەن قاتار، جالپى سوماسى 224 ميلليارد تەڭگەدەن استام كەلىسىمشارت جاسالدى.

وسىعان دەيىن قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ Industrial and Commercial Bank of China باسقارما ءتوراعاسى ليۋ تسزيۋنمەن كەزدەسكەن بولاتىن. وندا ينۆەستيتسيالىق ىنتىماقتاستىقتى تەرەڭدەتۋ پەرسپەكتيۆالارى جانە ۇزاقمەرزىمدى قارجىلاندىرۋدى تارتۋ ماسەلەلەرى تالقىلادى.