قىتاي جاساندى ينتەللەكت جۇيەلەرى مەكتەپ وقۋشىلارىنىڭ سۇراعىنا جاۋاپ بەرۋدى توقتاتتى

قىتايدا ۇلتتىق ءبىرىڭعاي ەمتيحان گاوكاونىڭ باستالۋىنا بايلانىستى ەلدەگى جاساندى ينتەللەكت جۇيەلەرى مەكتەپ وقۋشىلارىنا كومەك كورسەتۋدى ۋاقىتشا توقتاتتى، دەپ حابارلايدى fortune.com.

Qwen ،Doubao جانە Kimi اتتى تانىمال نەيروجەلىلەر 7-ماۋسىمنان باستاپ قولدانۋشىلار جىبەرگەن فوتو ارقىلى تاپسىرمالاردى تانىمايدى جانە سۇراقتارعا جاۋاپ بەرمەيدى.

ولاردىڭ جاۋابى بىردەي: «كەشىرىڭىز، بۇل - ادىلەتسىز. بۇل فۋنكتسيا 7-10-ماۋسىم ارالىعىندا قولجەتىمسىز».

مۇنداي شەكتەۋ ءبىلىم سالاسىنداعى ادىلدىكتى ساقتاۋ ماقساتىندا ەنگىزىلگەن. ەسكە سالا كەتەيىك، گاوكاو - قىتايداعى ەڭ ماڭىزدى جانە كۇردەلى ۇلتتىق ەمتيحان، ونىڭ ناتيجەسى بويىنشا وقۋشىلار جوعارى وقۋ ورىندارىنا تۇسەدى.

بۇل شەشىمدى ەلدىڭ ينتەرنەت قاۋىمداستىعى ەكىجاقتى قابىلدادى: ءبىر تاراپ ونى ادالدىققا باعىتتالعان قادام دەپ باعالاسا، ەكىنشىسى جاساندى ينتەللەكتكە تىم قاتتى سەنىم ارتىپ كەتكەن ءبىلىم جۇيەسىن سىنعا الدى.