قىتاي فەرمەرلەرى قۋاڭشىلىق ازابىن تارتىپ وتىر

 قىتايدا شارۋالار قۋاڭشىلىق زاردابىن تارتىپ وتىر. وعان اپتاپ ىستىق سەبەپ. بيىل ەلدەگى استىق شىعىمى 5 پايىزعا ازايۋى مۇمكىن دەگەن كۇدىك بار.

مىناۋ قىتايدىڭ ورتالىعىنداعى شەنسي پروۆينتسياسىنداعى كورىنىس. قۋاڭشىلىقتان ەگىن قۋراپ جاتىر. كورشى حەنان پروۆينتسياسىندا دا وسىنداي جاعداي. قوس ايماق تا قىتايدىڭ «بيداي بەلدەۋىندە» ورنالاسقان. كورشى ەلدە وندىرىلەتىن ءداندى داقىلدىڭ تورتتەن ءبىرى وسى ەكى وڭىرگە تيەسىلى. ءبىراق جەرگىلىكتى شارۋالار بيىل ءونىم ادەتتەگىدەن از جينالاتىنىن ەسكەرتىپ، جىلداعى كورسەتكىشكە قول جەتكىزە المايمىز دەپ دابىل قاعۋدا.

چجوۋ ياپين، شارۋا: «ادەتتە بيداي ماساعىندا 4 نە 5 داننەن بولادى. ال بيىل وزدەرىڭىز كورىپ تۇرعانداي، ءبىر، ارى كەتسە 2 داننەن عانا شىققان. بۇل ەگىن ونىمدىلىگىن ازايتادى. ءبىز سۋ مەن تىڭايتقىشتارعا قوسىمشا اقشا جۇمساپ، شىعىندارىمىز ايتارلىقتاي ارتىپ كەتتى».

بارىنە اۋا رايىنىڭ قولايسىزدىعى سەبەپ. مامىردا شەنسي پروۆينتسياسىندا كۇن شىجىپ، اۋا تەمپەراتۋراسى كەيىنگى 64  جىلدا بولماعان ەڭ جوعارى مەجەگە جەتكەن. سالدارىنان بيداي پىسپەي جاتىپ، قۋراپ كەتكەن. جەرگىلىكتى شارۋالار 20 جىلدا العاش رەت وسىنداي جاعدايعا تاپ بولعاندارىن ايتادى.

حوۋ، فەرمەر: «ءبىز تازا اۋىز سۋدىڭ وزىنە زار بوپ قالدىق. تىرشىلىك ءنارىن تۇسكە دەيىن كۇنىنە ءبىر رەت قانا جەتكىزەدى. ىشەتىن سۋدان تارىعىپ وتىرعاندا، سۋاراتىن سۋدىڭ ءوزىن تابۋ قانداي قيىن ەكەنىن ايتپاي- اق قويايىن».

قىتاي بيداي يمپورتى بويىنشا الەمدە ءبىرىنشى ورىندا تۇر. وتكەن جىلى رەكوردتىق كولەمدە 140 ميلليون توننا ءونىم جينالعان. ءسويتىپ، بىلتىردان ماردىمدى استىق قورى قالعان. ءقازىر ىشكى سۇرانىس تا جوعارى ەمەس. ونىڭ ۇستىنە قىتايعا استىق يمپورتتاۋشى ەڭ ءىرى ەلدىڭ ءبىرى اۆستراليادا ماۋسىم سوڭىنا تامان مول ءونىم جينالادى دەگەن بولجام بار. سول سەبەپتى ساراپشىلار شىعىسىمىزداعى كورشىمىزدە ءوندىرىس ازايسا دا بيداي تاپشىلىعىنىڭ تۋىنداۋى ەكىتالاي دەيدى.

جۇلدىز اتاگەلديەۆا

https://24.kz