قىتاي شىنجىن قالاسىنا قوسىمشا پوليتسەيلەر جىبەرىپ، قاۋىپسىزدىكتى كۇرت كۇشەيتىپ جاتىر

استانا. KAZINFORM - قىتايدىڭ گۋاڭدۇڭ پروۆينتسياسىنان قوسىمشا پوليتسيا بولىمشەلەرى اتەس سامميتى قارساڭىندا شىنجىن قالاسىنا جىبەرىلدى. قالادا پاترۋلدەۋ كۇشەيتىلىپ، قاۋىپتى جانە جارىلعىش زاتتاردى تاسىمالداۋ مەن ساقتاۋ باقىلاۋعا الىندى. بۇل تۋرالى تاسس اگەنتتىگى حابارلادى.

Фото: Kazinform / ЖИ

شىنجىن قالالىق قوعامدىق قاۋىپسىزدىك باسقارماسىنىڭ حابارلاماسىنا سايكەس، گۋاڭدۇڭ پروۆينتسياسىنىڭ بارلىق قۇقىق قورعاۋ ورگاندارىنا قاۋىپسىزدىك شارالارىن كۇشەيتىپ، پوليتسيا قىزمەتكەرلەرىنىڭ سانىن ارتتىرۋ تاپسىرىلعان.

- پوليتسيانىڭ قوسىمشا كۇشتەرى شىنجىن قالاسىنا جىبەرىلدى. ءتيىمدى جۇمىس جۇرگىزۋ ءۇشىن پروۆينتسيانىڭ بارلىق اۋماعىنداعى پوليتسيا بولىمشەلەرى جۇمىلدىرىلدى، - دەلىنگەن حابارلامادا.

سامميت قارساڭىندا قالا كوشەلەرىندەگى پاترۋلدەۋ كۇشەيتىلىپ، قۇقىقبۇزۋشىلىقتاردىڭ جولىن كەسۋ شارالارى جۇرگىزىلىپ جاتىر. سونىمەن قاتار قاۋىپتى جانە جارىلعىش زاتتاردى تاسىمالداۋ مەن ساقتاۋعا قويىلاتىن تالاپتار قاتاڭداتىلدى.

سامميت وتەتىن كۇندەرى شىنجىندە دروندار مەن باسقا دا تومەن بيىكتىكتە ۇشاتىن اپپاراتتاردى پايدالانۋعا تىيىم سالىندى.

قاراشا ايىنىڭ باسىندا قالا بيلىگى جول قوزعالىسى قاۋىپسىزدىگىنە قاتىسى جوق جاعدايلاردا كولىك سيگنالىن نەگىزسىز قولدانۋعا دا تىيىم ەنگىزگەن.

اتەس كوشباسشىلارىنىڭ 33- بەيرەسمي كەزدەسۋى 18-19-قاراشادا قىتايدىڭ وڭتۇستىگىندەگى گۋاڭدۇڭ پروۆينتسياسىنىڭ شىنجىن قالاسىندا وتەدى.

ايتا كەتەيىك، بۇعان دەيىن وسى سامميت بارىسىندا ۆلاديمير پۋتين، شي جينپيڭ جانە دونالد ترامپتىڭ ءۇشجاقتى كەزدەسۋىن وتكىزۋ تۋرالى كەلىسىمگە قول جەتكىزىلگەن ەدى.

بۇدان بولەك اق ءۇي دە قىتايدا ترامپ، پۋتين جانە شي جينپيڭ كەزدەسەتىنىن راستادى.