قىتاي شەتەلدىكتەردىڭ ەلگە كىرۋىن جەڭىلدەتپەكشى

قىتاي شەتەلدىكتەردىڭ ءبىرقاتار ساناتتارى ءۇشىن ەلگە كىرۋ ەرەجەلەرىن جەڭىلدەتەدى. بۇل تۋرالى قىتايدىڭ كوشى-قون جونىندەگى مەملەكەتتىك باسقارماسىنىڭ شەتەلدىكتەرمەن جۇمىس دەپارتامەنتىنىڭ ديرەكتورى ماو سيۋي ءمالىم ەتتى، دەپ حابارلايدى Kazinform رەسەيلىك تاسس اگەنتتىگىنە سىلتەمە جاساپ.

قىتايعا قىسقا مەرزىمدى قىزمەتپەن، اتاپ ايتقاندا، ىسكەرلىك ىنتىماقتاستىق، كاسىپكەرلىكپەن اينالىسۋ، تۋىستارىنا بارۋ، كورىكتى جەرلەردى ارالاۋ نەمەسە جەكە ىستەرىن جۇرگىزۋ ماقساتىندا كەلگەن شەتەلدىكتەر ەندى ۆيزانى ۇزارتۋ، اۋىستىرۋ جانە قايتا راسىمدەۋ تۋرالى ءوتىنىشتى تۇرعىلىقتى جەرىنە جاقىن يمميگراتسيالىق اكىمشىلىك ورگانىنا بەرە الادى.

سونىمەن قاتار، پورت ۆيزاسىن الۋ ءۇشىن قىتايعا كەلەتىن شەتەلدىكتەر ءۇشىن كىرۋ شارتتارى جەڭىلدەتىلىپ، ەلوردا اۋەجايلارى ارقىلى ترانزيتتىك ءوتۋ ءتارتىبى جەڭىلدەتىلەدى. بەيجىڭ اۋەجايلارىندا 24 ساعاتتان اسپايتىن مەرزىمگە ترانزيتپەن جۇرەتىن شەتەلدىكتەر شەكارالىق باقىلاۋ پروتسەدۋرالارىنان بوساتىلادى جانە ۆيزا قاجەت بولمايدى.

جاڭا ەرەجەلەر قىتايعا قىسقا مەرزىمگە تۋىستارىمەن كەزدەسۋگە بارۋدى دا جەڭىلدەتەدى. بۇل ماقساتپەن كىرەتىن شەتەلدىكتەردەن شاقىرۋشى تاراپپەن قارىم-قاتىناسىن راستاۋ جانە سايكەس اۋتەنتيفيكاتسيا پروتسەدۋرالارىنان ءوتۋ تالاپ ەتىلمەيدى. ونىڭ ورنىنا قابىلداۋشى تاراپ بۇل تۋرالى مالىمدەمە ۇسىنا الادى.

ماو سيۋي سونىمەن قاتار، يمميگراتسيانى باسقارۋ سالاسىنداعى اقپاراتتىق تەحنولوگيانىڭ جەتىلدىرىلۋىنە بايلانىستى ءوتىنىش بەرۋ پروتسەسى بۇرىنعىسىنان دا جەڭىلدەي تۇسەتىنىن ايتتى.