قىتاي ەگدە جاستاعىلارعا زاڭ كومەگىن كەڭەيتەدى

استانا. KAZINFORM - قىتايدىڭ ازاماتتىق ىستەر مينيسترلىگى جانە جوعارعى حالىق سوتىمەن قوسا 7 ۇكىمەتتىك ورگان قارت ادامدارعا كورسەتىلەتىن زاڭ قىزمەتتەرىنىڭ ساپاسىن ارتتىرۋ جانە ولاردىڭ قۇقىقتارىن قورعاۋ بويىنشا نۇسقاۋلىق ۇسىنىمداردى جاريالادى، دەپ حابارلايدى سينحۋا.

ەلدە 60 جاستان اسقان ادامداردىڭ سانى 310 ميلليوننان اسادى. قىتاي حالقىنىڭ قارتايۋىنا بايلانىستى - بۇل قادام ەگدە جاستاعى ازاماتتارعا قاتىستى تۋىندايتىن داۋلى ماسەلەلەردى شەشۋگە جانە ولار ءۇشىن قولايلى الەۋمەتتىك ورتا قالىپتاستىرۋعا باعىتتالعان.

قۇجاتتاعى باستى باسىمدىقتاردىڭ ءبىرى — قارتتاردىڭ سوت ورگاندارىنا كەدەرگىسىز قول جەتكىزۋىنە جاعداي جاساۋ جانە كورسەتىلەتىن قىزمەتتەردىڭ ساپاسىن جاقسارتۋ. سونداي- اق قۇجاتتا الدىن الا سوت ءىسىن جۇرگىزۋ، ۇيگە بارىپ زاڭ قىزمەتىن كورسەتۋ سياقتى ارنايى قىزمەتتەردى ەنگىزۋ كوزدەلگەن.

ۇسىنىمداردا قارتتارعا قارسى باعىتتالعان قىلمىستار ءۇشىن جازانى كۇشەيتۋ قاجەتتىگى دە كورسەتىلگەن. ولاردىڭ قاتارىنا الاياقتىق، ۇرلىق، بوپسالاۋ، سونداي- اق كۇتىم قىزمەتى جەلەۋىمەن مۇلىكتىك قۇقىقتارىنا قول سۇعۋ دا جاتادى. قۇجاتتا مۇراگەرلىك داۋلارى، قارتتارعا كۇتىم جاساۋ، قارجىنى باسقارۋ جانە دەنساۋلىققا قاتىستى تاۋارلار سەكىلدى سالالاردا تاۋەكەلدەردىڭ الدىن الۋ قاجەتتىگىنە ەرەكشە ءمان بەرىلگەن.

الەۋمەتتىك تۇرعىدان ءالسىز توپتاردى قورعاۋ ماقساتىندا، ۇسىنىمداردا قارت ادامداردىڭ تابىسىنا بايلانىستى زاڭ كومەگىن الۋعا قويىلاتىن شەكتەۋلەردى الىپ تاستاۋ ۇسىنىلادى. بۇل تۇرمىستىق زورلىق- زومبىلىققا، نەمقۇرايلى قاراۋعا نەمەسە قاراۋسىز قالۋعا ۇشىراعان قارتتارعا قاتىستى.

سونداي- اق قۇجاتتا جالعىز تۇراتىن، ەڭبەككە قابىلەتسىز نەمەسە دەمەنتسياعا شالدىققان قارت ادامدارعا كورسەتىلەتىن زاڭ كومەگىنىڭ اۋقىمىن كەڭەيتۋ ۇسىنىلادى.

وسىعان دەيىن قىتايلىقتاردىڭ 70 پايىزى سالماق تاستاۋدى ارماندايدى، ال 60 پايىزدان استامى بۇل ماقساتقا جەتۋ ءۇشىن ۋاقىت پەن كۇش جۇمساۋعا دايىن ەكەنى انىقتالدى.