قىتاي سىرتقى ىستەر مينيسترلىگىنىڭ رەسمي وكىلى گو جزياكۋن كيليان مباپپەنىڭ مالىمدەمەسىنە كەزەكتى باسپا ءسوز بريفينگىندە تۇسىنىكتەمە بەردى.
- ءبىز بۇل ادامنىڭ كەشىرىم سۇراعانىن ەسكەردىك، - دەدى قىتاي ديپلوماتى.
ەسكە سالايىق، قوعامنىڭ نارازىلىعىنا كيليان مباپپەنىڭ قىتاي حالىق رەسپۋبليكاسىنىڭ نەگىزىن قالاۋشى ماۋ زىدۇڭعا قاتىستى ايتقان پىكىرلەرى تۇسىرىلگەن بەينەجازبانىڭ ينتەرنەتتە تارالۋى سەبەپ بولدى.
وسىدان كەيىن قىتاي كومپانيالارى مباپپەمەن كوممەرتسيالىق كەلىسىمشارتتارىن توقتاتتى، مەدياپلاتفورمالار وعان قاتىستى كونتەنتتى ءوشىردى. ورتالىق تەلەارنا ونىڭ ماتچتارى مەن جارىستارىن كورسەتۋدى توقتاتىپ، قاتىسۋىمەن تۇسىرىلگەن جارنامالاردى ەفيردەن الىپ تاستادى.
كەيىن كيليان مباپپە X الەۋمەتتىك جەلىسىندەگى پاراقشاسىندا فرانسۋز، قىتاي جانە اعىلشىن تىلدەرىندە رەسمي تۇردە كەشىرىم سۇرادى.
قىتايدىڭ مەملەكەتتىك مەديا كورپوراتسياسى China Media Group وسى ماسەلەگە قاتىستى مالىمدەمە جاساپ، كەشىرىم سۇراۋ تۋرالى اقپاراتتى نازارعا العانىن حابارلادى.
- لا ليگا باسشىلىعى، مادريدتىك «رەال» كلۋبى مەن كيليان مباپپە بۇل وقيعادان ساباق الىپ، شىن جۇرەكتەن كەشىرىم سۇراپ، جىبەرگەن قاتەلىكتەرىن تۇبەگەيلى تۇزەتەدى دەپ ۇمىتتەنەمىز، - دەلىنگەن مالىمدەمەدە.
يسپانياداعى جاعدايدى رەتتەۋ ءۇشىن لا ليگا پرەزيدەنتى حاۆەر تەباس سەيسەنبى كۇنى قىتايدىڭ يسپانياداعى ەلشىسىمەن كەزدەستى.
- كيليان مباپپەنىڭ مالىمدەمەسىنە بايلانىستى تۋىنداعان جاعدايدى جان-جاقتى تالقىلاپ، بۇل ماسەلەنى تۇبەگەيلى شەشۋدىڭ جولدارىن قاراستىرۋ ءۇشىن قىتايدىڭ يسپانياداعى ەلشىسىمەن كەزدەستىم، - دەدى تەباس.
بۇعان دەيىن قىتايدا مباپپە قاتىسقان ماتچتار مەن جارنامالاردى كورسەتۋ توقتاتىلعانى حابارلانعان بولاتىن.