قىتاي بانكتەرى رەسەيمەن ساۋدادا قيىندىققا ۇشىرادى
استانا. KAZINFORM - امەريكا قۇراما شتاتتارىنىڭ ىقتيمال قارجىلىق سانكسيالارىنا تاپ بولعان قىتايدىڭ ءىرى بانكتەرى قىتاي مەن رەسەي اراسىنداعى ترانزاكسيالاردى تەكسەرۋدى كۇشەيتىپ، قىتاي-رەسەي ءىرى ساۋدا تاپسىرىستارىنان باس تارتتى. سوندىقتان قىتايلىق ەكسپورتتاۋشىلار شەكاراداعى شاعىن بانكتەر جانە استىرتىن قارجىلاندىرۋ ارنالارى ارقىلى ەسەپ ايىرىسۋعا ءماجبۇر.
Reuters اگەنتتىگىنىڭ حابارلاۋىنشا، رەسەي- ۋكراينا سوعىسى باستالعاننان بەرى ا ق ش رەسەي مەن رەسەيلىك قۇرىلىمدارعا ءبىرقاتار سانكسيالار ەنگىزگەن.
ەندى ا ق ش قىتايدىڭ بانك سەكتورىنا سانكسيا سالۋدى جوسپارلاپ وتىر. سەبەبى، ۆاشينگتون قىتاي رەسەيدىڭ قورعانىس ونەركاسىبىن قولدايدى دەپ سانايدى.
Reuters-نىڭ ايتۋىنشا، قىتايدىڭ گۋاڭدۋڭ پروۆينسياسىندا ورنالاسقان ەلەكتر قۇرىلعىلارىن ءوندىرۋشى كاسىپورىننىڭ ءونىمىن رەسەيگە جونەلتۋدە قيىندىق تۋدىرعانى اتاپ ءوتىلدى، سەبەبى بۇل ونىمدە ماسەلە بولعانى ەمەس، قىتايلىق بانكتەردىڭ ترانزاكسيا تولەمدەرىنە شەكتەۋ قويعانى.
بۇل كومپانيانىڭ نەگىزىن قالاۋشى ۋاڭ مىرزانىڭ ايتۋىنشا، قازىر ءىرى بانكتەرگە رەسەيدەن تولەمدەردى الۋ ءۇشىن بىرنەشە اي قاجەت.
سوندىقتان ولار قىتاي- رەسەي شەكاراسىنداعى ايماقتاردا بەلسەندى ۆاليۋتا بروكەرلەرىن تولەمدەردى شەشۋ ءۇشىن پايدالانۋ مۇمكىندىگىن قاراستىرىپ جاتقانىن ايتتى.
گۋاڭدۋڭداعى ەلەكترونيكا كومپانياسىنىڭ مەنەدجەرى قىتايدىڭ بارلىق ءىرى بانكتەرى ناۋرىز ايىنىڭ باسىنان بەرى رەسەيمەن ەسەپ ايىرىسۋدى توقتاتقانىن جەتكىزدى.
ال جياڭسۋ پروۆينسياسىنداعى حيميالىق ماشينا جاساۋ كومپانياسىنىڭ ليۋ ەسىمدى قىزمەتكەرى جيلين حۋنچۋن اۋىلدىق كوممەرتسيالىق بانكىندە ەسەپشوت اشۋ ءۇشىن ءۇش اي بويى كەزەكتە تۇرعانىن ايتتى.
Wall Street Journal وسى ايدىڭ 22 سى كۇنى وسى ماسەلەمەن تانىس ادامدارعا سىلتەمە جاساپ، ا ق ش سانكسيا جوباسىن ازىرلەپ جاتقانىن جانە كەيبىر قىتايلىق بانكتەردى الەمدىك قارجى جۇيەسىنەن شىعارامىز دەپ قورقىتقانىن حابارلادى.
كەيىنىرەك Reuters اگەنتتىگى ا ق ش-تىڭ انونيمدى شەنەۋنىكتەرىنە سىلتەمە جاساپ، امەريكا قۇراما شتاتتارى باستاپقىدا كەيبىر قىتايلىق بانكتەرگە سانكسيا سالۋدى تالقىلاعانىن، ءبىراق مۇنداي شارالاردى جۇزەگە اسىرۋ جوسپارىن ءالى جاساماعانىن حابارلادى.
اۆتور
مۇحتار قاليموللا ۇلى