قىتاي بالا كۇتىمى بويىنشا سۋبسيدياعا 12,6 ميلليارد دوللار بولەدى
استانا. KAZINFORM - قىتاي قارجى مينيسترلىگى بيىل ورتالىق بيۋدجەتتەن بالا كۇتىمى بويىنشا سۋبسيديالاردى تولەۋگە 90 ميلليارد يۋان (شامامەن 12,6 ميلليارد ا ق ش دوللارى) بولىنەتىنىن مالىمدەدى، دەپ حابارلايدى شينحۋا.
ورتالىق بيۋدجەتتەن بولىنەتىن ترانسفەرتتىك تولەمدەر اياسىندا قۇرىلاتىن بۇل باعدارلاما جەرگىلىكتى بيلىك ورگاندارىنا جالپى تولەم كولەمىنىڭ شامامەن 90 پايىزىن جابۋعا مۇمكىندىك بەرەدى.
قىتاي حالىق رەسپۋبليكاسىنىڭ دەنساۋلىق ساقتاۋ ىستەرى جونىندەگى مەملەكەتتىك كوميتەتىنىڭ رەسمي وكىلى ۆان حايدۋننىڭ ايتۋىنشا، بالا كۇتىمى بويىنشا سۋبسيديالار تامىزدىڭ ءۇشىنشى ونكۇندىگىنەن باستاپ قىتايدىڭ بۇكىل اۋماعىنا بىرتىندەپ ەنگىزىلەدى. 31-تامىزعا قاراي بۇل كومەك بارلىق وڭىردە تولىق قولجەتىمدى بولادى دەپ كۇتىلىپ وتىر.
ونىڭ سوزىنشە، كوميتەت ءتيىستى ۇكىمەتتىك ورگاندارمەن بىرلەسىپ، بالا كۇتىمى بويىنشا سۋبسيديا جۇيەسىن باسقارۋ ەرەجەلەرى مەن قارجى قورلارىن رەتتەيتىن قۇجاتتاردى ازىرلەپ جاتىر.
سونىمەن قاتار جەرگىلىكتى بيلىك وڭىرلىك ەرەكشەلىكتەردى ەسكەرە وتىرىپ، سۋبسيديانى جۇزەگە اسىرۋدىڭ ناقتى جوسپارلارىن جاساپ، قىزمەتكەرلەردى ىرىكتەۋ جانە وقىتۋ جۇمىستارىن جۇرگىزۋى ءتيىس.
قىتاي جاقىندا بالا كۇتىمىنە ارنالعان مەملەكەتتىك سۋبسيديا جۇيەسىن ەنگىزەتىنىن جاريالادى. بۇل - وتباسىلاردى قولداۋ جانە تۋۋ كورسەتكىشىن ارتتىرۋعا باعىتتالعان اۋقىمدى شارالاردىڭ ءبىرى.
باعدارلاما اياسىندا 2025 -جىلدان باستاپ 3 جاسقا دەيىنگى ءار بالاعا جىل سايىن 3600 يۋان (شامامەن 503 ا ق ش دوللارى) كولەمىندە تولەم جاسالادى.
بۇل سۋبسيديالار جەكە تابىس سالىعىنان بوساتىلادى جانە وتباسىنىڭ نە جەكە ادامنىڭ تابىسى رەتىندە ەسەپتەلمەيدى. ياعني، ەڭ تومەنگى كۇنكورىس دەڭگەيىندەگى نەمەسە از قامتىلعان ساناتقا جاتاتىن ازاماتتاردىڭ جاردەماقى الۋىنا اسەر ەتپەيدى.