قىتاي اسكەرى تايۆان ماڭىندا بىرلەسكەن وقۋ-جاتتىعۋ وتكىزىپ جاتىر

استانا. KAZINFORM - قىتاي حالىق-ازاتتىق ارمياسىنىڭ شىعىس وڭىرلىك قولباسشىلىعى تايۆان ارالىنىڭ ماڭىندا قۇرلىق، تەڭىز، اۋە جانە زىمىران كۇشتەرىنىڭ قاتىسۋىمەن بىرلەسكەن وقۋ-جاتتىعۋ وتكىزۋدە. بۇل تۋرالى Lianhe Zaobao باسىلىمى حابارلادى.

شىعىس وڭىرلىك قولباسشىلىعىنىڭ رەسمي وكىلى شي ي 1-ساۋىردەن باستاپ اسكەري وكرۋگتىڭ قۇرلىق، تەڭىز، اۋە جانە زىمىران كۇشتەرى تايۆان ارالىنا تاقاۋ ايماقتا كوپجاقتى تەڭىز جانە اۋە پاترۋلدەرىن ۇيىمداستىرىپ، جەدەل ۇرىستىق دايىندىق، كەشەندى ۇستەمدىككە قول جەتكىزۋ، تەڭىز بەن قۇرلىقتاعى نىساندارعا سوققى جاساۋ، ماڭىزدى سۋ ايدىندارى مەن ارنالارىن باقىلاۋعا الۋ سياقتى تاكتيكالىق جاتتىعۋلار وتكىزەتىنىن حابارلادى. بۇل جاتتىعۋلار قارۋلى كۇشتەردىڭ بىرلەسكەن جاۋىنگەرلىك دايىندىعىن تەكسەرۋگە باعىتتالعان.

ق ح ر مەملەكەتتىك كەڭەسىنىڭ تايۆان ىستەرى جونىندەگى كەڭسەسىنىڭ رەسمي وكىلى جۋ فەنليان بۇگىن كەزەكتى وقۋ- جاتتىعۋ تايۆان جەتەكشىسى لاي شيندە مەن ونىڭ «تاۋەلسىزدىككە» ۇمتىلعان «دالباسا ارەكەتىنە» بەرىلگەن قاتاڭ جاۋاپ ءارى تايۆان بۇعازىنىڭ بەيبىتشىلىگىنە ادەيى قاۋىپ ءتوندىرىپ وتىرعان سەپاراتيستىك كۇشتەرگە جاسالعان قاتال ەسكەرتۋ ەكەنىن مالىمدەدى.

چجۋ فەنلياننىڭ ايتۋىنشا، لاي شيندە «تايۆان تاۋەلسىزدىگى» ۇستانىمىنان باس تارتپاي، ماتەريكتىك قىتايدى اشىقتان- اشىق «شەتەلدىك جاۋ كۇشى» دەپ اتاپ، قايداعى ءبىر «17 تارماقتى ستراتەگيانى» كولدەنەڭ تارتىپ، ماتەريكتىك قىتايعا قارسى ناسيحاتتى ۇدەتىپ، ەكىجاقتى بايلانىسقا توسقاۋىل قويىپ، تايۆان بۇعازىنداعى شيەلەنىستى كۇشەيتىپ وتىر.

جۋ فەنليان «تايۆان تاۋەلسىزدىگىنىڭ» سوعىس شاقىراتىنىن، تايۆان حالقىنا قاۋىپ پەن قاتەر اكەلەتىنىن باسا ايتتى.

ونىڭ ايتۋىنشا، قىتايدىڭ تايۆان ماسەلەسىن شەشۋ مەن وتاندى قايتا بىرىكتىرۋ جولىنداعى ۇستانىمى بولاتتاي بەرىك، ەشبىر كۇشتىڭ تايۆاندى قىتايدان ءبولىپ اكەتۋىنە جول بەرىلمەيدى، «تاۋەلسىزدىكتى» جاقتايتىن كەز كەلگەن سەپاراتيستىك ارەكەتكە مۇمكىندىك جوق.

ال تايۆاننىڭ «قورعانىس مينيسترلىگى» سەيسەنبى كۇنى جاريالاعان مالىمدەمەگە سايكەس، 31-ناۋرىز تاڭعى ساعات 6:00 دەن 1-ءساۋىر تاڭعى ساعات 6:00 گە دەيىن حالىق-ازاتتىق ارمياسىنىڭ 19 اسكەري كەمەسى تايۆان ارالىنىڭ ماڭىنا تاياپ بارعان. سونداي-اق، قىتايدىڭ «شاندۋن» اۆيانوسەتستەر توبى دا العاش رەت تايۆاننىڭ جەدەل ارەكەت ايماعىنا ءىز تاستادى. «تايۆان اسكەرى» اۋە جانە تەڭىز كۇشتەرى مەن جاعالاۋداعى زىمىران جۇيەسى ارقىلى جاعدايدى مۇقيات باقىلاپ وتىر.

مالىمدەمەدە تايۆان «قارۋلى كۇشتەرىنىڭ» جاعدايدى باقىلاۋ ءۇشىن بارلاۋ جۇيەسى مەن جەدەل ارەكەت مەحانيزمىن دە ىسكە قوسقانى حابارلاندى.

مالىمدەمەدە تايۆانعا تونگەن قاۋىپتىڭ كۇن ساناپ ارتىپ كەلە جاتقانى اتاپ ءوتىلدى.

- تايۆان اسكەرى ارالدى قورعاۋعا تاس-ءتۇيىن دايىن وتىر، ءبىز «قاقتىعىستى ۋشىقتىرماۋ، جانجال تۋدىرماۋ» قاعيداتىن ۇستانىپ، سۇر ايماقتاعى ىقتيمال شابۋىلعا سالقىن سابىرمەن لايىقتى جاۋاپ بەرەمىز، - دەلىنگەن مالىمدەمەدە.

سونداي-اق وندا تايۆان تارابى ارالدىڭ قاۋىپسىزدىگى مەن قورعانىسىن قامتاماسىز ەتۋگە تولىق دايىن ەكەنى ايتىلعان.

ەرلان مازان