قىتاي ارالدىڭ قۇرعاپ قالعان تانابىنا ورمان ەگەدى
استانا. قازاقپارات - قىتايلىق عالىمدار قازاقستانعا ارالدىڭ قۇرعاپ قالعان تانابىنا جاساندى ورمان ەگۋ بويىنشا قولداۋ كورسەتۋگە دايىن، دەپ حابارلايدى Ulysmedia.kz.
ق ر ەكولوگيا جانە تابيعي رەسۋرستار ءمينيسترى ەرلان نىسانبايەۆ جاساندى ورمان ەكپەلەرىن جاساۋ بويىنشا قىتاي عىلىم اكادەمياسىنىڭ شىنجاڭ ەكولوگيا جانە گەوگرافيا ينستيتۋتىنىڭ عالىمدارىمەن بىرلەسكەن كەزدەسۋ وتكىزدى.
تالقىلاۋ بارىسىندا ءوڭىردىڭ ەكولوگياسىنا تەرىس اسەردى ازايتۋ ءۇشىن ارال تەڭىزىنىڭ قۇرعاعان تۇبىنە (ا ت ق ت) ورمان ەگۋ ماسەلەلەرى قارالدى.
مينيستر قىتاي جاساندى ورمان ەكپەلەرىنىڭ كولەمى بويىنشا الەمدىك رەكوردشى ەكەنىن ەسكەرە وتىرىپ، ق ح ر عالىمدارىمەن بىرلەسىپ ورمانداردى مولىقتىرۋ جونىندەگى عىلىمي زەرتتەۋلەردە تاجىريبە الماسۋ بويىنشا ءوزارا ىنتىماقتاستىقتى نىعايتۋدىڭ ماڭىزدىلىعىن اتاپ ءوتتى.
سونىمەن قاتار، ارال تەڭىزىنىڭ قۇرعاعان تۇبىندە ەكولوگيالىق ماسەلەلەردى شەشۋ بويىنشا بىرلەسكەن قازاقستان-قىتاي ورتالىعىن قۇرۋ ۇسىنىلدى.