قىتاي الەمدەگى ەڭ ۇلكەن كۇن ەلەكتر ستانسياسىن ىسكە قوستى

استانا. KAZINFORM - قىتايدا نيۋ-يورك كولەمىمەن تەڭ الەمدەگى ەڭ ۇلكەن كۇن ەلەكتر ستانسياسى ىسكە قوسىلدى. بۇل تۋرالى Independent حابارلادى.

باسىلىمنىڭ مالىمەتىنشە، ستانسا جىلىنا 6 ميلليارد كيلوۆات-ساعاتتان استام ەنەرگيا وندىرۋگە قاۋقارلى جانە بۇل كولەم شاعىن ەلدى ەنەرگيامەن تولىق قامتاماسىز ەتۋگە جەتەدى. بۇل ەلەكتر ستانسياسى شىنجاڭنىڭ باتىس بولىگىنىڭ ءشولدى ايماعىندا ورنالاسقان جانە 200 مىڭ گەكتار اۋماقتى الىپ جاتىر.

قىتايدىڭ بۇگىندە كۇن ەنەرگياسىن ءوندىرۋ بويىنشا الەمدە كوشباسشى ەكەنى جانە 2023 -جىلى قۋاتىن 50 پايىزدان استامعا ارتتىراتىنى اتاپ ءوتىلدى. جاڭا كۇن ەلەكتر ستانسياسى قىتايداعى Ningxia Teneggeli جانە Golmud Wutumeiren جوبالارىن باسىپ وزىپ، الەمدەگى ەڭ ۇلكەن ستانسياعا اينالدى.

حالىقارالىق ەنەرگەتيكالىق اگەنتتىك قىتايدىڭ ەنەرگەتيكالىق ساياساتىنا قاتىستى بولجامدار جاسادى. ونىڭ ايتۋىنشا، 2028 -جىلعا قاراي قىتاي دۇنيە جۇزىندە وندىرىلەتىن جاڭارتىلاتىن ەنەرگيانىڭ شامامەن 60 پايىزىنا يە بولادى. بۇعان قوسا، قىتاي 2030 -جىلعا قاراي الەمدەگى جاڭا قۋاتتاردىڭ جارتىسىنان كوبىن شىعارۋدى جوسپارلاپ وتىر.

Longi Green Energy Technology كومپانياسىنىڭ باعالاۋى بويىنشا، 2023 -جىلعا قاراي جاقىن بولاشاقتا قىتاي شاتىرلار مەن عيماراتتارعا كۇن باتارەيالارىن ورناتۋ ارقىلى وڭتۇستىك- شىعىس ازياداعى بارلىق ءۇي شارۋاشىلىقتارىن قۋاتتاندىرۋعا جەتكىلىكتى ەلەكتر قۋاتىن وندىرەدى.

اۆتور

جاراسقان نۇرىبايەۆ