قىتاي افريكاعا 50 ميلليارد دوللار كولەمىندە قارجىلىق قولداۋ كورسەتپەك

استانا. KAZINFORM - 2024 -جىلعى قىتاي- افريكا ىنتىماقتاستىعى فورۋمى (FOCAC) سامميتى 4-6-قىركۇيەك ارالىعىندا بەيجىڭدە وتۋدە.

ق ح ر ءتوراعاسى شي جينپيڭ 5-قىركۇيەكتە سامميتتىڭ اشىلۋ سالتاناتىنا قاتىستى.

اشىلۋ سالتاناتىندا شي جينپيڭ ءوز سوزندە قىتاي وزىمەن ديپلوماتيالىق قارىم-قاتىناسى بار بارلىق افريكا ەلدەرىمەن ەكىجاقتى قارىم-قاتىناسىن ستراتەگيالىق قارىم-قاتىناس دەڭگەيىنە كوتەرگەنىن حابارلادى.

شي جينپيڭ، سونداي-اق، الداعى ءۇش جىلدا قىتايدىڭ افريكا ەلدەرىمەن ون باعىتتا ىنتىماقتاستىق جۇرگىزەتىنىن ايتتى.

بۇل ىنتىماقتاستىق ەكونوميكا، ساۋدا، اۋىل شارۋاشىلىعى، مەديتسينالىق دەنساۋلىق جانە قاۋىپسىزدىك سالالارىن قامتيتىن بولادى.

بۇعان افريكاعا 1 ميلليارد يۋاننىڭ شۇعىل ازىق-تۇلىك كومەگىن كورسەتۋ جانە افريكا ەلدەرىنە 6000 اسكەري قىزمەتكەر مەن 1000 پوليتسيا قىزمەتكەرىن دايىنداۋعا كومەكتەسۋ كىرەدى.

شي جينپيڭ بۇل جوسپاردى «ارىپتەستىكتىڭ ون ارەكەتى» دەپ اتايدى.

- «ارىپتەستىكتىڭ ون ارەكەتىن» جۇزەگە اسىرۋعا جاردەمدەسۋ ماقساتىندا قىتاي ۇكىمەتى قىتاي مەن افريكانىڭ ءارتۇرلى سالالارداعى پراكتيكالىق ىنتىماقتاستىعىنا كۇشتى قولداۋ كورسەتۋگە دايىن. - دەدى شي جينپيڭ.

حابارلانعانداي، وسى سامميت بارىسىندا قىتاي مەن افريكانىڭ 53 ەلى بىرلەسە وتىرىپ، «جاڭا داۋىردەگى بارلىق جاعدايدا ورتاق بولاشاعى بار قىتاي- افريكا قوعامداستىعىن بىرلەسىپ قۇرۋ تۋرالى «بەيجىڭ دەكلاراتسياسى» جانە «قىتاي- افريكا ىنتىماقتاستىعى فورۋمى - بەيجىڭ ءىس-شارالار جوسپارى (2025-2027 ج ج.)» قابىلداندى.

قىتاي-افريكا ىنتىماقتاستىعى فورۋمى 2000 -جىلى قۇرىلدى. وعان مۇشە ەلدەرگە قىتاي، قىتايمەن ديپلوماتيالىق قارىم-قاتىناستارى بار 53 افريكا ەلى جانە افريكا وداعى كوميسسياسى، جالپى سانى 55 مۇشە كىرەدى.

اۆتور

مۇقتار مۇرات