قىتاي ا ق ش- تىڭ يرانعا جاساعان شابۋىلىن قاتاڭ ايىپتادى

استانا. KAZINFORM - قىتاي ا ق ش-تىڭ يرانعا جاساعان شابۋىلدارىن جانە حالىقارالىق اتوم ەنەرگياسى اگەنتتىگىنىڭ كەپىلدىگىندە تۇرعان يادرولىق نىساندارعا باعىتتالعان امەريكالىق بومبالاۋدى قاتاڭ ايىپتايدى. بۇل تۋرالى ق ح ر سىرتقى ىستەر مينيسترلىگىنىڭ مالىمدەمەسىندە ايتىلدى.

- ا ق ش- تىڭ بۇل قادامى - بىرىككەن ۇلتتار ۇيىمى جارعىسىنىڭ ماقساتتارى مەن قاعيداتتارىن، سونداي-اق حالىقارالىق قۇقىقتى ەلەۋلى تۇردە بۇزۋ بولىپ سانالادى جانە تاياۋ شىعىستاعى جاعدايدى ودان ءارى ۋشىقتىرادى، - دەلىنگەن قىتاي سىرتقى ىستەر مينيسترلىگىنىڭ مالىمدەمەسىندە.

قىتاي قاقتىعىسقا قاتىسۋشى بارلىق تاراپتى، ەڭ الدىمەن ءيزرايلدى، تەز ارادا وق اتۋدى توقتاتۋعا، بەيبىت تۇرعىنداردىڭ قاۋىپسىزدىگىن قامتاماسىز ەتۋگە، ديالوگ پەن كەلىسسوزدەر باستاۋعا شاقىردى.

- قىتاي تاراپى حالىقارالىق قاۋىمداستىقپەن بىرلەسىپ ارەكەت ەتۋگە، ادىلەتتىلىكتى قورعاۋعا، تاياۋ شىعىستا بەيبىتشىلىك پەن تۇراقتىلىقتى قالپىنا كەلتىرۋگە جاردەمدەسۋگە دايىن، - دەپ اتاپ ءوتتى قىتاي حالىق رەسپۋبليكاسى س ءى م.

ەسكە سالا كەتەيىك، 22 - ماۋسىمعا قاراعان ءتۇنى ا ق ش قارۋلى كۇشتەرى يران اۋماعىنداعى ءۇش ءىرى يادرولىق نىسانعا جاپپاي سوققى جاسادى. بۇل - 1979-جىلدان بەرگى العاشقى وسىنداي شابۋىل.

ا ق ش پرەزيدەنتى دونالد ترامپ امەريكالىق اسكەردىڭ يراننىڭ ءۇش يادرولىق نىسانىنا ءساتتى سوققى جاساعاننان كەيىن حالىققا ۇندەۋ جولدادى.

يراننىڭ اتوم ەنەرگەتيكاسى جونىندەگى اگەنتتىگى ا ق ش- تىڭ ناتانز جانە فوردو قالالارىنداعى زاۋىتتارعا جاساعان شابۋىلىنا قاراماستان، ەلدىڭ ۋران بايىتۋ باعدارلاماسى توقتاتىلمايتىنىن مالىمدەدى. يرانداعى يادرولىق نىساندارعا سوققىدان كەيىن رادياتسيالىق قاۋىپ انىقتالعان جوق

كەيىننەن يران ا ق ش- تىڭ يادرولىق وبەكتىلەرىنە جاساعان سوققىلارىنا جاۋاپ قاتتى. سونىمەن قاتار يران ا ق ش- تى اگرەسسيا ءۇشىن ايىپتاپ، حالىقارالىق تەرگەۋگە الۋدى تالاپ ەتتى.

ۇلى بريتانيا يراننىڭ يادرولىق نىساندارىنا ا ق ش- تىڭ سوققىلارىن قولدادى.

ب ۇ ۇ قاۋىپسىزدىك كەڭەسى ا ق ش- تىڭ يرانعا سوققى جاساۋىنا بايلانىستى شۇعىل جينالىس وتكىزدى.