قىتاي ا ق ش- تىڭ قوسىمشا باج سالىعىن ارتتىرۋىنا قارسى شاعىم ءتۇسىردى
استانا. قازاقپارات - 2025 -جىلعى 27-ناۋرىز كۇنى تۇستەن كەيىن قىتاي حالىق رەسپۋبليكاسىنىڭ ساۋدا مينيسترلىگى كەزەكتى باسپا ءسوز ءماسليحاتىن وتكىزىپ، قىتايدىڭ ا ق ش- تىڭ قوسىمشا باج سالىعىن ەنگىزۋىنە قاتىستى دۇنيەجۇزىلىك ساۋدا ۇيىمىنىڭ (د س ۇ) داۋلاردى شەشۋ مەحانيزمى شەڭبەرىندە شاعىم تۇسىرگەنىن مالىمدەدى، دەپ حابارلايدى Kazinform thepaper.cn سايتىنا سىلتەمە جاساپ.
قىتاي حالىق رەسپۋبليكاسىنىڭ ساۋدا مينيسترلىگىنىڭ رەسمي وكىلى حە يادۋن مالىمدەمەسىندە:
- ا ق ش- تىڭ قىتايدان ەكسپورتتالاتىن تاۋارلارعا قوسىمشا باج سالىعىن ەنگىزۋى - بۇل ءبىرجاقتى جانە پروتەكسيونيستىك ارەكەت بولىپ تابىلادى جانە د س ۇ ەرەجەلەرىن ورەسكەل بۇزۋ سانالادى. وسىعان بايلانىستى قىتاي بۇل ماسەلە بويىنشا د س ۇ داۋلاردى شەشۋ مەحانيزمىنە جۇگىندى. 14-ناۋرىزدا ا ق ش تاراپى د س ۇ- دا كەلىسسوزدەر جۇرگىزۋگە كەلىستى. قىتاي بۇدان ءارى د س ۇ نورمالارىنا سايكەس ءتيىستى راسىمدەردى جالعاستىرادى، - دەدى.
بۇعان دەيىن، 25-ناۋرىزدا وتكەن باسپا ءسوز ءماسليحاتىندا قىتاي ساۋدا مينيسترلىگىنىڭ وكىلى ا ق ش- تىڭ بىرنەشە قىتايلىق كومپانيالاردى ەكسپورتتىق باقىلاۋ تىزىمىنە ەنگىزۋىن سىنعا الىپ، ونى «ۇلتتىق قاۋىپسىزدىك تۇجىرىمداماسىن كەڭىنەن پايدالانۋ جانە ەكسپورتتىق باقىلاۋ شارالارىن اسىرا قولدانۋ» دەپ اتاعان بولاتىن.
قىتاي تاراپىنىڭ ايتۋىنشا، بۇل قادام «باسقا ەلدەردىڭ كومپانيالارىن باسىپ-جانشۋ جانە ولاردىڭ دامۋعا دەگەن زاڭدى قۇقىقتارىن شەكتەۋ ماقساتىن كوزدەيدى»، سونداي-اق «جاھاندىق وندىرىستىك جانە جەتكىزۋ تىزبەكتەرىنىڭ قاۋىپسىزدىگى مەن تۇراقتىلىعىنا ايتارلىقتاي زيان كەلتىرەدى».
- ا ق ش- تىڭ بۇل ارەكەتى ەكىجاقتى ديالوگ پەن ىنتىماقتاستىق ارقىلى ماسەلەلەردى شەشۋ ءۇشىن قولايلى ورتا قالىپتاستىرۋعا ىقپال ەتپەيدى. قىتاي تاراپى ا ق ش- تى ءوز قاتەلىگىن دەرەۋ تۇزەتۋگە شاقىرادى جانە قىتاي كومپانيالارىنىڭ زاڭدى قۇقىقتارى مەن مۇددەلەرىن قورعاۋ ءۇشىن قاجەتتى شارالاردى قابىلدايتىن بولادى، - دەپ مالىمدەدى قىتاي ساۋدا مينيسترلىگىنىڭ وكىلى.
بۇعان دەيىن قىتايدىڭ سىرتقى ىستەر مينيسترلىگى ا ق ش- تىڭ ەكسپورتتىق باقىلاۋ قۇرالدارىن اسىرا پايدالانىپ، زاڭسىز ءبىرجاقتى سانكسيالار ەنگىزۋىن ايىپتاعان بولاتىن.