قىتايدىڭ تابيعي رەسۋرستار مينيسترلىگىنىڭ مالىمەتىنشە، ەكسپەديتسيا بارىسىندا زەرتتەۋشىلەر مۇحيت تۇبىندەگى تەرەڭ شۇڭعىمادان بازالت ۇلگىلەرىن الدى.
قىتايدا ازىرلەنگەن بۇرعىلاۋ قوندىرعىسىنىڭ كومەگىمەن ۇزىندىعى 4,27 مەتر بولاتىن بازالت ۇلگىسى شىعارىلدى. اگەنتتىك مالىمەتىنشە، قىتاي مۇحيتتىق بۇرعىلاۋ كەمەسىنىڭ كومەگىمەن تەرەڭ مۇحيت باسسەينىندەگى قاتتى تاۋ جىنىستارىنىڭ ۇلگىلەرىن العان ا ق ش پەن جاپونيادان كەيىنگى ءۇشىنشى ەل اتاندى.
زەرتتەۋ جۇمىستارىنا تەرەڭسۋلى قاشىقتان باسقارىلاتىن اپپاراتتار دا تارتىلدى. ەكى اپپارات شامامەن 4 مىڭ مەتر تەرەڭدىكتە جالپى 358 ساعاتتان استام جۇمىس ىستەگەن.
الىنعان ۇلگىلەر مەن جينالعان دەرەكتەر وڭتۇستىك قىتاي تەڭىزىنىڭ قالىپتاسۋى مەن كەڭەيۋىن، ەجەلگى تەڭىز ورتاسىنىڭ ەۆوليۋتسياسىن زەرتتەۋگە، سونداي-اق اسا تەرەڭ سۋلارداعى ەنەرگەتيكالىق رەسۋرستاردى بارلاۋعا جانە يگەرۋگە پايدالانىلماق.
ەكسپەديتسياعا توعىز عىلىمي-زەرتتەۋ مەكەمەسىنەن 170 زەرتتەۋشى قاتىستى.
«مەنسيان» مۇحيتتىق بۇرعىلاۋ كەمەسى قىتايدا 2024-جىلى پايدالانۋعا بەرىلگەن.
بۇعان دەيىن قىتاي وربيتادا وسىمدىكتىڭ 14 تۇرىنە جاتاتىن 20 دان استام سۇرىپتى ءوسىرىپ جاتقانى تۋرالى حابارلادىق. قىتاي عارىشكەرلەرىن دايارلاۋ عىلىمي-زەرتتەۋ ورتالىعى بۇل جەتىستىكتى عارىش ستانتسياسىندا وسىمدىكتەردى اۋقىمدى كولەمدە وسىرۋگە نەگىز قالايتىن ماڭىزدى كەزەڭ دەپ باعالادى.