قىتاي ساۋدا مينيسترلىگىنىڭ 2026-جىلعى 29-قىركۇيەكتەگى حابارلاماسىنا سايكەس، 2027-جىلعا ارنالعان اۆتوموبيل جانە موتوسيكل ەكسپورتىنا ليسەنزيا الۋعا ءوتىنىم بەرۋ ونلاين فورماتتا جۇرگىزىلەدى.
جۇيە 2026-جىلعى 30-قىركۇيەكتە ىسكە قوسىلعان. وندىرۋشىلەر ساۋدا مينيسترلىگىنىڭ ءبىرىڭعاي باسقارۋ پلاتفورماسى ارقىلى ءوتىنىمدى تولتىرىپ، قاجەتتى قۇجاتتاردى جۇكتەپ، ولاردى جەرگىلىكتى ساۋدا ورگاندارىنا تەكسەرۋگە جىبەرەدى.
جاڭا تارتىپتە شەتەلدەگى ساتۋدان كەيىنگى جوندەۋ جانە سەرۆيستىك قىزمەت كورسەتۋ جەلىلەرىنە قاتىستى تالاپتارعا ەرەكشە ءمان بەرىلگەن. كاسىپورىندار شەتەلدىك سەرۆيستىك ورتالىقتارمەن ىنتىماقتاستىق تۋرالى كەلىسىم نەمەسە شارت ۇسىنۋى ءتيىس. ەگەر جەلى كومپانيانىڭ ءوزى قۇرعان نىسان بولسا، بۇل تۋرالى ءمور باسىلعان تۇسىندىرمە بەرىلەدى.
سونىمەن قاتار سەرۆيستىك ورتالىقتىڭ جۇمىس ىستەۋ قۇقىعىن راستايتىن قۇجاتتار، جوندەۋ مۇمكىندىكتەرى تۋرالى مالىمەت، ىشكى جانە سىرتقى فوتوسۋرەتتەر، تەحنيكالىق جابدىقتاردىڭ ءتىزىمى، قىزمەتكەرلەردىڭ بىلىكتىلىگىن راستايتىن قۇجاتتار جانە قوسالقى بولشەكتەردى جەتكىزۋگە قاتىستى مالىمەتتەر تالاپ ەتىلەدى.
ماسەلەن، ء بىرىنشى ساناتتاعى اۆتوموبيل وندىرۋشىلەرى كەمىندە 50 سەرۆيستىك ورتالىق تۋرالى اقپارات ۇسىنۋى كەرەك.
وزگەرتىلگەن اۆتوموبيلدەر وندىرۋشىلەرىنە دە قوسىمشا تالاپتار قويىلادى. ولار وتكەن جىلعى ەكسپورت كولەمىن جانە ونى راستايتىن قۇجاتتاردى، وندىرىستىك قۋاتى تۋرالى مالىمەتتەردى، ەكسپورتتالعان كولىكتەردىڭ وندىرىستىك جازبالارىن، شاسسي مەن ارنايى جابدىقتاردى ساتىپ الۋ كەلىسىمدەرى مەن شوتتارىن، سونداي-اق ەكسپورتتىق دەكلاراتسيالاردى تاپسىرۋى ءتيىس.
بۇدان بولەك، كومپانيالار ەكسپورتقا شىعارۋدى جوسپارلاعان مودەلدەرى تۋرالى تولىق اقپارات بەرۋگە مىندەتتى. ونىڭ ىشىندە كولىككە ەنگىزىلگەن وزگەرىستەردىڭ سيپاتتاماسى، فوتوسۋرەتتەر، قىتايدىڭ ونەركاسىپ جانە اقپاراتتىق تەحنولوگيالار مينيسترلىگىنىڭ كولىك وندىرۋشىلەرى مەن ونىمدەرى تىزىمىندەگى مالىمەتتەر جانە مىندەتتى سەرتيفيكاتتاۋ تۋرالى اقپارات بولۋى كەرەك.
قىتاي بيلىگى ەكسپورتتاۋشىلاردان شەتەلدە زاڭ تالاپتارىنا سايكەس جۇمىس ىستەۋ تۋرالى مىندەتتەمە دە تالاپ ەتەدى. كومپانيالار باعا بەلگىلەۋ كەزىندە زاڭ نورمالارىن ساقتاپ، ادىلەتسىز باسەكەلەستىك ارقىلى نارىق ءتارتىبىن بۇزباۋعا ءتيىس. ەكسپورت ليسەنزياسىن راسىمدەۋ كەزىندە كولىك باعاسى سياقتى اقپاراتتى دا دۇرىس كورسەتۋ قاجەت.
جەرگىلىكتى ساۋدا ورگاندارى كاسىپورىنداردىڭ وتىنىمدەرىن 2026-جىلعى 28-قازانعا دەيىن الدىن الا تەكسەرىپ، قىتاي ساۋدا مينيسترلىگىنە ونلاين تۇردە جىبەرۋى ءتيىس. قاعاز تۇرىندەگى قۇجاتتار دا مينيسترلىكتىڭ اكىمشىلىك قىزمەت كورسەتۋ ورتالىعىنا جولدانادى.
كاسىپورىن بەلگىلەنگەن مەرزىمدە جىلدىق ەكسپورتتىق بىلىكتىلىككە ءوتىنىم بەرمەسە نەمەسە جاريا تالقىلاۋ كەزەڭىندە سۇرالعان تۇزەتۋلەر مەن قوسىمشا قۇجاتتاردى ۇسىنباسا، ونىڭ ەكسپورت ليسەنزياسىنا ءوتىنىشى بۇدان ءارى قابىلدانبايدى.
جاڭا ءتارتىپ قىتايدىڭ اۆتوموبيل جانە موتوتسيكل ەكسپورتىنىڭ كولەمىن عانا ەمەس، شەتەلدەگى سەرۆيستىك ينفراقۇرىلىم، ەكسپورتتىق باعا بەلگىلەۋ جانە كومپانيالاردىڭ سىرتقى نارىقتاعى زاڭعا سايكەستىگىنە قويىلاتىن تالاپتاردى دا جۇيەلەۋگە باعىتتالعان.