قىرعىزستان ءىرى ينۆەستورلار ءۇشىن جاعدايدى جەڭىلدەتىپ جاتىر

استانا. KAZINFORM -  ەلدە تىكەلەي شەتەلدىك ينۆەستيتسيالاردى تارتۋ ماقساتىندا ءىرى بيزنەستى ىنتالاندىرۋ شارالارى جۇزەگە اسىرىلىپ جاتىر، دەپ حابارلايدى Kazinform اگەنتتىگىنىڭ قىرعىزستانداعى مەنشىكتى ءتىلشىسى.

قىرعىز رەسپۋبليكاسىنىڭ ۇلتتىق ينۆەستيتسيالار اگەنتتىگىندە اتاپ وتكەندەي، «ق ر- داعى ينۆەستيتسيالار تۋرالى» زاڭنىڭ ەرەجەلەرىنە سايكەس ينۆەستورلارعا قىرعىز رەسپۋبليكاسىنىڭ مينيسترلەر كابينەتىمەن تىكەلەي جەكە ينۆەستيتسيالىق كەلىسىم جاساسۋ مۇمكىندىگى بەرىلگەن.

اگەنتتىكتىڭ مالىمەتىنشە، اتالعان نورما كەمىندە 10 ميلليون ا ق ش دوللارىن سالۋعا دايىن، حالىقارالىق ىسكەرلىك بەدەلى بار، بىرەگەي بىلىمدەرى مەن تابىستى ينۆەستيتسيالىق جوبالاردى جۇزەگە اسىرۋ تاجىريبەسى بار ينۆەستورلارعا قولدانىلادى.

ينۆەستيتسيالىق كەلىسىم اياسىندا ينۆەستورلارعا تومەندەگىدەي مۇمكىندىكتەر ۇسىنىلۋى مۇمكىن:

سالىقتىق جانە كەدەندىك جەڭىلدىكتەر مەن پرەفەرەنتسيالار؛

نەگىزگى قىزمەتكەرلەر ءۇشىن ۆيزالىق قولداۋ؛

جوبالاردى ىسكە اسىرۋعا ارنالعان جەر تەلىمدەرىن تاڭداۋعا جانە راسىمدەۋگە جاردەمدەسۋ.

ۇلتتىق ينۆەستيتسيالار اگەنتتىگى حالىقارالىق جانە جەرگىلىكتى ينۆەستورلاردى ىنتىماقتاستىققا شاقىرىپ، ينۆەستيتسيالىق باستامالاردى ءوتىنىم بەرۋدەن باستاپ جوبانى ىسكە اسىرۋعا دەيىن تولىق قولداۋعا دايىن ەكەنىن مالىمدەدى.

بۇعان دەيىن قىرعىزستاندا ورتاشا ايلىق جالاقى 42 مىڭ سومنان اسقانى تۋرالى جازعان ەدىك.