قىستا قارعا، جازدا باتپاققا باتامىز: قوياندى اۋىلىنىڭ تۇرعىندارى جولدى جاۋىپ تاستادى

كوكشەتاۋ. KAZINFORM - اقمولا وبلىسىنىڭ قوياندى اۋىلى تۇرعىندارى سۋ تاسقىنىنا بايلانىستى توتەنشە جاعداي جاريالاۋدى تالاپ ەتىپ، جولدى جاۋىپ تاستادى.

تۇرعىنداردىڭ سوزىنشە، ءبىراز تۇرعىن ءۇي مەن اۋلالارعا سۋ كىرگەن. سول سەبەپتى، جەرگىلىكتى اۋقىمداعى توتەنشە جاعداي ەنگىزۋدى تالاپ ەتۋدە.

الەۋمەتتىك جەلىدە جەلدەي ەسكەن ۆيدەودا نارازى حالىق قىستا قار الىپ، كوكتەم مەن جازدا لاي-باتپاققا باتامىز دەپ وتىر.

وسىعان بايلانىستى اقمولا وبلىسى اكىمدىگىنىڭ باسپا ءسوز قىزمەتىنەن تۇسىنىك بەردى. مالىمەتكە ساي، ناۋرىزدىڭ 26 ى ساعات 20:40 شاماسىندا قوياندى اۋىلىنىڭ 50 گە جۋىق تۇرعىنى اۋىل اكىمدىگىنىڭ جانىنداعى جولدى جاۋىپ تاستاعان. جەرگىلىكتى تۇرعىندار سۋ تاسقىنىنا قارسى ءىس-شارالار ماسەلەلەرىنە نازار اۋدارۋ ماقساتىندا جينالعان. نارازى تۇرعىندارمەن سەلينوگراد اۋدانىنىڭ اكىمى ب. وسپانبەكوۆ جانە اقمولا وبلىستىق ت ج د باستىعى ك. دوسپايەۆ كەزدەستى.

«ساعات 22:00 دە بارلىق جولدار اشىلىپ، تۇرعىندار ۇيلەرىنە تاراي باستادى. قازىرگى ۋاقىتتا قوياندى اۋىلىندا سۋ تاسقىنىنا قارسى كۇشەيتىلگەن ءىس-شارالار جۇرگىزىلۋدە. شامامەن 150 مىڭ تەكشە مەتر قار شىعارىلدى. سونداي-اق قوياندى اۋىلىندا 9,5 مىڭ مەتر ارىقتار مەن كانالدار، 46 سۋ وتكىزۋ قۇبىرى تازارتىلدى، 35 مىڭنان استام تەكشە مەتر ەرىگەن قار سۋى سورىلدى. جولداردى جابۋ سياقتى زاڭسىز ارەكەتتەرگە جول بەرىلمەيدى. زاڭنامانى بۇزعانى ءۇشىن جاۋاپكەرشىلىك قاراستىرىلعانىنا نازار اۋدارىڭىزدار»، - دەپ ءتۇسىندىردى اكىمدىكتەن.

ايتا كەتسەك، بۇدان بۇرىن اقمولا وبلىسىنىڭ اكىمى مارات احمەتجانوۆ كوكشەتاۋدا جەرتولەسىن سۋ باسقان مەكتەپكە بارعان ەدى.

اۆتور
اسلان وسپانوۆ