قىس تۇسكەندە جۇرگىزۋشىلەر كولىكتىڭ قىسقى شينالارىن ۋاقىتىندا اۋىستىرىپ، ولاردى دۇرىس تاڭداۋعا ءمان بەرۋى كەرەك. بۇل جول قاۋىپسىزدىگى ءۇشىن ماڭىزدى.
قىسقى شينالاردىڭ نەگىزگى تۇرلەرى قانداي
اۆتوكولىكتەرگە ارنالعان قىسقى شينالار ءۇش نەگىزگى تۇرگە بولىنەدى.
ءبىرىنشىسى - شەگەلى شينالار. شەگەلى شينالار مۇزدى جانە كوكتايعاق جولدا جولمەن جاقسى ىلىنىسەدى. مۇنداي شينالار اۋا تەمپەراتۋراسى جيى تومەندەپ، مۇز قاتاتىن ايماقتارعا قولايلى.
ەكىنشىسى - فريكسيالىق (جابىسپالى) شينالار. بۇل ءتۇرى قالا جاعدايىندا جانە جۇمساق كليماتتا ءتيىمدى. فريكسيالىق شينالار قارلى جول مەن دىمقىل اسفالتتا ءتيىمدى، ءبىراق مۇز ۇستىندە شەگەلى شينالارعا قاراعاندا ءىلىنىسۋى تومەن بولۋى مۇمكىن.
ءۇشىنشىسى - جىل بويعى شينالار. جىل بويعى شينالاردىڭ قىسقى جاعدايدا تيىمدىلىگى كليماتقا جانە شينانىڭ ناقتى سيپاتتامالارىنا بايلانىستى. سوندىقتان ولاردى بارلىق قىس جاعدايىنا بىردەي جارامدى دەپ كورسەتۋگە بولمايدى.
قىسقى شينانى تاڭداعاندا نەگە ءمان بەرۋ كەرەك
مامانداردىڭ ايتۋىنشا، قىسقى شينالاردى تاڭداۋدا ءبىرقاتار تەحنيكالىق كورسەتكىشكە نازار اۋدارۋ قاجەت.
جىلدامدىق جانە جۇكتەمە يندەكسى. تاڭدالعان شينالار كولىكتىڭ تەحنيكالىق سيپاتتامالارىنا سايكەس بولۋى ءتيىس. بۇل كورسەتكىش شينانىڭ رۇقسات ەتىلگەن ەڭ جوعارى جىلدامدىعى مەن كوتەرە الاتىن سالماعىن ايقىندايدى.
پروتەكتور تەرەڭدىگى. قىسقى شينالاردىڭ پروتەكتورىنىڭ تەرەڭدىگى كەمىندە 4 ميلليمەتر بولۋى كەرەك. بۇل كورسەتكىش جولمەن ءىلىنىسۋ ساپاسىنا جانە كولىكتىڭ تۇراقتىلىعىنا تىكەلەي اسەر ەتەدى.
قولدانۋ مەرزىمى. تاجىريبە بويىنشا بەس جىلدان اسقان شينالاردى پايدالانۋ ۇسىنىلمايدى، سەبەبى ۋاقىت وتە كەلە ولار ءوزىنىڭ سەرپىمدىلىك قاسيەتىن جوعالتادى.
قىسقى شيناعا قاتىستى قانداي تالاپتار بار؟
كەدەن وداعىنىڭ «دوڭگەلەكتى كولىك قۇرالدارىنىڭ قاۋىپسىزدىگى تۋرالى» تەحنيكالىق رەگلامەنتىنە (ت ر ت س 018/2011) سايكەس، 1-جەلتوقسان مەن 28-(29) اقپان ارالىعىندا بارلىق م1، N1، N2 جانە N3 ساناتىنداعى كولىكتەر (جەڭىل اۆتوموبيلدەر، جۇك كولىكتەرى جانە اۆتوبۋستار) قىسقى شينالارمەن جابدىقتالۋى ءتيىس. قىسقى شينالاردا مىندەتتى تۇردە M S نەمەسە تاۋ بەينەسىندەگى قار ۇلپاسى بەلگىسى (3PMSF) بولۋى قاجەت. اتالعان تالاپتاردى بۇزعان جاعدايدا جۇرگىزۋشىلەر قازاقستان رەسپۋبليكاسىنىڭ قولدانىستاعى زاڭناماسىنا سايكەس اكىمشىلىك جاۋاپكەرشىلىككە تارتىلادى.
قىسقى شينانى قالاي كۇتىپ ۇستاۋ كەرەك؟
ساراپشىلار قىسقى كەزەڭدە شينالاردى ۇدايى تەكسەرىپ وتىرۋدىڭ ماڭىزدىلىعىن اتاپ وتەدى. سۋىق اۋا رايىندا شينالارداعى قىسىم تومەندەيدى، بۇل كولىك باسقارىلۋىنا جانە وتىن شىعىنىنا اسەر ەتەدى. شينالاردىڭ جارىق، ءتىلىم جانە توزۋ بەلگىلەرىن دەر كەزىندە انىقتاپ، اۋىستىرۋ قاجەت. دوڭگەلەكتەردىڭ تەڭگەرىمى (بالانسيروۆكاسى) بۇزىلعان جاعدايدا شينالاردىڭ مەرزىمىنەن بۇرىن توزۋى جانە كولىكتىڭ تۇراقتىلىعىنىڭ تومەندەۋى مۇمكىن.
- قىسقى شينالاردى ۋاقتىلى ورناتىپ، ولاردى دۇرىس پايدالانۋ ءاربىر جۇرگىزۋشىنىڭ قاۋىپسىزدىگىنىڭ كەپىلى. كولىكتى قىسقى ماۋسىمعا الدىن الا دايىنداۋ ارقىلى جۇرگىزۋشىلەر ءوز ءومىرىن جانە وزگەلەردىڭ قاۋىپسىزدىگىن ساقتايدى، - دەلىنگەن حابارلامادا.
بۇعان دەيىن شىمكەنتتە توزعان شينالاردى قايتا وڭدەۋ قۋاتى جىلىنا 10 مىڭ تونناعا دەيىن ارتقانىن جازعانبىز.