قىسقى دوڭگەلەكتى قالاي تاڭداعان ءجون؟ -ماماندار كەڭەسى

استانا. قازاقپارات- كارى قۇدا قىس تاياۋ. ءدال قاي كۇنى قار ءتۇسىپ، كۇننىڭ سۋىتاتىنى بەلگىسىز. ايتكەنمەن كىم-كىمدە كولىگىنىڭ قىسقى دوڭگەلەگىن سايلاپ جاتقانى انىق. ال ەندى وسى قىسقى دوڭگەلەكتىڭ قاندايىن سالۋ كەرەك؟ ونىڭ قانداي تۇرلەرى بار؟ ماماندار نە دەيدى؟

كۇن سۋىتىپ بارادى. ءۇپ ەتكەن جەلدىڭ ارتى قارعا اينالسا، قاربالاس باستالادى. كولىك دوڭگەلەگىن ساتاتىن دۇكەندەردىڭ ساۋداسى قىزاتىن ۋاقىت. ءبىراق تەمىر تۇلپاردى تىزگىندەگەنىمىزبەن دوڭگەلەككە اسا ءمان بەرمەيدى ەكەنبىز. شىنىندا دوڭگەلەكتەگى جازۋلار نەنى مەڭزەيدى؟ ونى ساتۋشى ماماننان بىلدىك. مىسالعا، Р ءارپى ءبىز ويلاعانداي راديۋسى ەمەس، دوڭگەلەكتىڭ ولشەمى عانا ەكەن.

يسلامجان سىدىقوۆ، ساتۋشى:

- «R16» ، «R14» دەگەندەر - ول ولشەمى. ول بارلىق دوڭگەلەكتەردە بىردەي جۇرەدى. ولشەمى ءارتۇرلى بولادى، ءبىراق بارلىق دوڭگەلەكتەردە دە بولادى. ەندى «Y95» «H84» دەگەن بولادى. ولار سالماققا بايلانىستى. «Y92» دەگەن ول 690 كەلىگە دەيىن كوتەرەدى. «R» ءارپى بار راديالدى دوڭگەلەك جەڭىل جانە جۇمساق جۇرەدى.

ماماننىڭ پايىمى - بۇل. 3 ءتۇرلى فيرمانىڭ ءونىمىن ساتاتىن يسلامجان سىدىقوۆتىڭ سوزىنە سەنسەك، ماشينا دوڭگەلەگىنىڭ ءبىر- بىرىنەن ايىرماشىلىعى كولەمىندە جانە باعاسى مەن ساپاسىندا ەكەن.

يسلامجان سىدىقوۆ، ساتۋشى:

- ءبىز باللون ساتامىز. قىسقى جانە جازعى. 3 ءتۇرلى فيرما بار. بۇلاردىڭ ايىرماشىلىعى باعاسى مەن ساپاسىندا. شاما كەلسە، «شيپى» سالعانى دۇرىس. «تورموز» ۇستاۋىنا دا جاقسى بولادى. جۇرگەندە دە جەڭىل جۇرەدى. جۇمساق ءارى جۇرۋگە قولايلى.

«قىس مىنەر شاناڭدى جازدا سايلا»، - دەيدى قازاق. قازىردىڭ وزىندە ءبىراز اعايىن قامدانىپ، قىسقى دوڭگەلەك ساتىپ الىپ جاتىر. تاپسىرىس بەرگەندەر دە كوپ. ارينە، قول جەتكەندەر جاڭاسىن سالدىرادى. ەسكىسىن قيماي ءجۇرىپ الاتىندار دا تابىلادى. ماماندار مۇنى كولىك يەسىنىڭ جاۋاپكەرشىلىگىمەن بايلانىستىرادى.

ءىلياس الىموۆ، دوڭگەلەك جوندەۋشى:

- سىمى شىققانشا جۇرەتىندەر بار. جوق ەمەس ونداي ادامدار. ادەيى ولاي جۇرمەيتىن شىعار. كەيبىرەۋىندە مۇمكىندىگى بولماي قالادى. كوبىسى جاڭاعا قاراعاندا قولدانىلعان دوڭگەلەكتەردى سالدىرىپ الادى. ادام تاعدىرى جۇرگىزۋشىنىڭ قولىندا. سوندىقتان باللونعا كوڭىلدى كوپ ءبولۋ كەرەك.

«كولىكپەن ۇزاق جولعا شىققاندا نەمەسە تاس جولدا جۇرگەندە جابىسقاق دوڭگەلەگىن سالعان دۇرىس. بۇل اسىرەسە قىستا قولايلى. ويتكەنى قار جۇقپايدى. ال شەگە قاعىلعان دوڭگەلەك اسفالتتا كوپكە شىدامايدى»، - دەيدى دوڭگەلەك ساتۋ كومپانياسىنىڭ وكىلى جاندوس ساپاروۆ.

جاندوس ساپاروۆ، كومپانيا مەحانيگى:

- قۇمدى جولداردا، اۋىلدىق جەرلەردە، تاۋلى جەرلەردە جۇرگەندە МТ فورماتىندا دوڭگەلەكتەر سالعان ءتيىمدى. ويتكەنى ونىڭ قۇرامىندا پروتەكتورلار، بىرىنشىدەن، قالىڭ بولادى. ساپاسى مىقتىراق بولادى. تاستارعا جىرتىلا قويمايدى.

ماماننىڭ ايتۋىنشا، كولىكتىڭ دوڭگەلەگىن باپتاي دا، ساقتاي دا ءبىلۋ كەرەك. كۇتىپ ۇستاسا، كەمى 2-3 جىل پايدالانۋعا بولادى. «قىسقى دوڭگەلەكتى قار تۇسكەنىن كۇتپەي سالعان دۇرىس. ويتكەنى جولعا مۇز قاتادى. ال ونىڭ ارتى اپاتقا سوقتىرۋى مۇمكىن. بۇدان بولەك، كولىك تەپە- تەڭدىك ساقتاپ ءجۇرۋى ءۇشىن دوڭگەلەكتىڭ جەلىن دە ءجيى تەكسەرىپ تۇرۋ مىندەت»، - دەيدى ماماندار.

24.kz