قىسقى ازيادا: حاربيندە اتلەتتەر قالاشىعى مەن مەديا-وتەل اشىلدى

استانا. KAZINFORM - قىتايدىڭ حاربين قالاسىندا وتەتىن IX قىسقى ازيا ويىندارىنىڭ اتلەتتەر قالاشىعى مەن مەديا-وتەلى رەسمي اشىلدى.

«جەنمين جيباو» باسىلىمىنىڭ حابارلاۋىنشا، قىسقى ازيا ويىندارىندا مۇز سپورتى بويىنشا اتلەتتەر قالاشىعى رەتىندە، Harbin Victories Hotel قوناق ءۇيى 27-قاڭتار كۇنى العاشقى شەتەلدىك سپورتشىلاردى قابىلدادى.

قار سپورتى بويىنشا اتلەتتەر قالاشىعى يابۋليداعى Avaunce Hotel Yabuli قوناق ۇيىندە ورنالاسقان.

Harbin2025.com سايتىنىڭ حابارلاۋىنشا، IX قىسقى ازيا ويىندارىنىڭ مەديا-وتەلى 28-قاڭتار كۇنى رەسمي جۇمىسىن باستادى. ولاردىڭ قاتارىندا جازبا جۋرناليستەر مەن فوتوتىلشىلەر ءۇشىن 4 قوناق ءۇي، تەلەكانالدار تىلشىلەرى ءۇشىن 2 قوناق ءۇي بەلگىلەنگەن.

ەسكە سالساق، IX قىسقى ازيا ويىندارى 2025-جىلدىڭ 7-14-اقپانى ارالىعىندا قىتاي حالىق رەسپۋبليكاسى حەيلۋنتسزيان پروۆينتسياسىنىڭ حاربين قالاسىندا وتەدى. سپورتشىلار 11 سپورت ءتۇرى بويىنشا 64 مەدال جيىنتىعىن ساراپقا سالادى.

ق ر تۋريزم جانە سپورت مينيسترلىگىنىڭ حابارلاۋىنشا، قازاقستاننان 139 سپورتشى ەل نامىسىن قورعايدى.

وسىعان دەيىن قىسقى ازيا ويىندارىنا قاتىساتىن قازاقستان قۇراماسىنىڭ ءتىزىمى جاريالانعان بولاتىن.

اۆتور مۇحتار قاليموللا ۇلى