قۋىرىلعان ەت يىسىنەن جۇرەك اينۋى - اسقازان وبىرىنىڭ ءبىر بەلگىسى

سولتۇستىك قازاقستان وبلىسىندا اسقازان وبىرى ءجيى كەزدەسەتىن ونكولوگيالىق اۋرۋلاردىڭ قاتارىندا. قازىرگى ۋاقىتتا 332 سىرقات ديسپانسەرلىك ەسەپكە الىنعان. ونىڭ 79 ى بيىل اۋىرىپ، قازىرگى ۋاقىتتا ەم الىپ جاتىر. اسقازان قاتەرلى ىسىگىنىڭ پايدا بولۋىنا نە سەبەپ، كۇتىنۋ ءۇشىن قانداي شارالاردى قولدانعان ءجون. Kazinform تىلشىسىنە س ق و كوپبەيىندى اۋرۋحانا ونكولوگيالىق ورتالىعىنىڭ حيرۋرگ دارىگەرى ازامات بەلبەيەۆ ايتىپ بەردى.

- ازامات قاسىم ۇلى، قاتەرلى ىسىك اۋرۋلارىنىڭ كوپكە دەيىن سىر بەرمەيتىنى بەلگىلى، دەسەك تە اسقازان وبىرىنىڭ العاشقى بەلگىلەرى بار ما؟

- يا، تەكسەرىلمەگەن جاعدايدا ونكولوگيالىق اۋرۋلاردى تەك سوڭعى ساتىلارىندا عانا انىقتاپ جاتامىز. ءبىراق پاتسيەنتتەرمەن سويلەسۋ بارىسىندا اسقازانداعى جايسىزدىقتىڭ وسىدان جارتى جىل، كەيدە ءتىپتى 11 اي بۇرىن پايدا بولعانىن بىلەمىز. سىرقات دەر كەزىندە دارىگەرگە كورىنبەيدى، التىن ۋاقىتتى جوعالتادى. تەك اۋرۋ جانىنا باتقاندا عانا ماماننىڭ كومەگىنە جۇگىنەدى. باسىلمايتىن قىجىل، اسقازاندا اۋىرلىق، سۇيىق تاعامعا اۋىسۋ، قۇسۋ، سالماق جوعالتۋ، قۋىرىلعان ەت يىسىنەن جۇرەك اينۋ - مۇنىڭ ءبارى اۋرۋدىڭ العاشقى بەلگىلەرى. ال دەرت اسقىنعاندا ادام كۇرت سالماق جوعالتادى، قۇرساق قۋىسىندا سۇيىقتىقتىڭ جينالۋىنا بايلانىستى ءىش كولەمى ۇلعايادى، ۇنەمى قۇسادى.

- وبىردى انىقتاۋ ءۇشىن قانداي دياگنوستيكالىق ءادىستى قولدانعان ءجون؟ نەلىكتەن ونكوماركەرلەر اسقازان قاتەرلى ىسىگىن دۇرىس كورسەتپەيدى؟

- اسقازان وبىرى دياگنوزىن قويۋ ءۇشىن فيبروەزوفاگوگوسترودۋودەنوسكوپيا (ف ە گ د س) جاساۋ قاجەت. سوڭعى كەزدە اسقازاننىڭ بەينەسىن كورسەتەتىن قۇرىلعىلار بار. نەلىكتەن زەرتتەۋدىڭ تولىق اتاۋىن اتاپ ءوتتىم. بۇل زەرتتەۋدە ءبىز اسقازان- ىشەك جولدارىنىڭ بۇكىل جوعارعى قاباتىن تەكسەرەمىز. ادەتتە پاتسيەنتتەر اسقازاندى قارادى دەپ ويلايدى، جوق، بۇل ادىستە جۇتقىنشاق، وڭەش، سودان كەيىن عانا اسقازان تەكسەرىلەدى. ونكوماركەرلەر وبىردىڭ العاشقى ساتىلارىندا اقپارات بەرمەيدى.

بيىل ءساۋىر ايىندا جاس ايەلگە فگدس جاسالدى، وعان سوزىلمالى گاستريت، اسقازاندا سۇيىقتىق بار دەپ قورىتىندى بەرىلدى. ناۋقاس تا، دارىگەرلەر دە وبىر جوق دەپ ارقانى كەڭگە سالدى. 4 ايدان كەيىن سىرقاتتا IV ساتىداعى اسقازان قاتەرلى ىسىگى انىقتالدى. ەندوسكوپيست اسقازاندا سۇيىقتىق بار ەكەنىن اتاپ ءوتتى! دارىگەر ناۋقاستى قايتا تەكسەرۋگە جىبەرۋى كەرەك ەدى، ءبىراق ول مۇنى ورىندامادى.

كەيدە دياگنوز قويۋ ءۇشىن نەمەسە ول دياگنوزدى جوققا شىعارۋ ءۇشىن ناۋقاستى ف گ د س-كە 2-3 رەت جىبەرۋگە تۋرا كەلەدى. مەنىڭ ويىمشا، ەندوسكوپيستەرگە زور جاۋاپكەرشىلىك جۇكتەلگەن. سوندىقتان مامان دايارلاۋعا بارىنشا قاراجات سالۋ كەرەك.

- اسقازان وبىرى ەمدەلە مە؟

- كوبىنە راديكالدى ءادىس قولدانىلىپ، وتا جاسالادى. بۇل - بۇكىل اسقازاندى نەمەسە اسقازاننىڭ ءبىر بولىگىن الىپ تاستاۋ. وكىنىشكە وراي، ەلىمىزدە اسقازان قاتەرلى ىسىگى بار 2800 ناۋقاس انىقتالسا، سونىڭ مىڭعا جۋىعىنا، ياعني 1/3 عانا وتا جاسالادى، 2/3 بولىگى ءارتۇرلى رەجيمدە حيميوتەراپيا الادى. ال جالپى ءدارى-دارمەكتەر بار، ەمدەۋ جولى بەلگىلى.

- اسقازان وبىرىنىڭ الدىن الۋ ءۇشىن قانداي كەڭەس بەرەسىز؟

- ءبىزدىڭ مەملەكەت وڭەش پەن اسقازان وبىرىن ەرتە انىقتاۋ ماسەلەلەرىنە كوپ كوڭىل بولەدى. 2012 -جىلدان باستاپ ءبىزدىڭ وبلىستا پيلوتتىق رەجيمدە اسقازان مەن وڭەش قاتەرلى ىسىگىن ەرتە انىقتاۋ بويىنشا سكرينينگ جۇرگىزىلىپ كەلەدى. سكرينينگپەن 50-60 جاس ارالىعىنداعى ادامدار قامتىلادى.

ەگەر اسقازاندا قانداي دا ءبىر پروبلەما بولسا، جىلىنا كەمىندە 1-2 رەت زەرتتەۋدەن ءوتۋ قاجەت. وسىعان دەيىن ايتىپ وتكەن بەلگىلەر بولعان جاعدايدا جەدەل تۇردە دارىگەرگە قارالۋ كەرەك.

اسقازان قاتەرلى ىسىگىنىڭ الدىن الۋدىڭ نەگىزگى جولى - تاماقتانۋ رەجيمىن ساقتاۋ: ىستالعان جانە قاتتى قۋىرىلعان تاعامداردى، كونسەرۆىلەنگەن تاعامداردى، جانۋارلاردىڭ مايلارىن تۇتىنۋدى ازايتۋ؛ الكوگول مەن تەمەكى شەگۋدەن باس تارتۋ؛ كۇندەلىكتى راتسيوندا جەمىستەر مەن كوكونىستەردى قولدانۋ.

سونداي-اق اسقازان قاتەرلى ىسىگىنىڭ الدىن العىڭىز كەلسە، اسقازان پوليپوزى، سوزىلمالى اتروفيالىق گاستريت سەكىلدى ارتى وبىرعا اپارۋى مۇمكىن اۋرۋلاردى دەر كەزىندە ەمدەتۋ كەرەك.

- اسقازان وبىرىنا نەگىزىنەن كىمدەر شالدىعادى؟

- وبلىستاعى ستاتيستيكاعا توقتالساق، قازىر وڭىردە اسقازان وبىرى دياگنوزى 332 ادامعا قويىلعان. بىلتىر 113 ادامدا، بيىل 79 سىرقاتتا جاڭادان انىقتالدى. اۋىرعانداردىڭ شامامەن ءار ءۇشىنشىسى - ەر ادام. وكىنىشكە قاراي، بىلتىر 55, بيىل 41 ناۋقاس قايتىس بولدى.

جالپى اسقازان وبىرىنىڭ IV ساتىسىنىڭ ۇلەس سالماعى - )، ياعني ءار ءۇشىنشى ناۋقاس اۋرۋى اسقىنعان كەزدە عانا بىزگە جۇگىنەدى. 60 جاستان اسقان ادامدار ءجيى شالدىعادى، سونىمەن بىرگە وبىردى 30 جانە 40 جاسقا دەيىنگى ادامداردا انىقتاعان جاعدايلار بار. دەمەك، ءبىزدىڭ وڭىردە سىرقاتتانۋشىلىق پەن ءولىم-ءجىتىم بويىنشا جاعداي كوڭىل كونشىتپەيدى.

- راحمەت!

اۆتور

اقەركە داۋرەنبەك قىزى