قىركۇيەكتە ەرتىس وزەنى تاعى تاسۋى مۇمكىن

پاۆلودار. KAZINFORM - بۇعان شىعىس قازاقستانداعى سۋ قويمالارىنىڭ سۋ بوساتۋ كولەمىن %50 عا ارتتىرۋى سەبەپ بولۋى مۇمكىن. كۇزدە وزەنگە سەكۋندىنا 1500 تەكشە مەتر سۋ جىبەرىلەدى دەگەن بولجام بار.

بۇل تۋرالى پاۆلودار وبلىسىنىڭ جەر قويناۋىن پايدالانۋ، قورشاعان ورتا جانە سۋ رەسۋرستارى باسقارماسى باسشىسىنىڭ ورىنباسارى ديار قايىركەنوۆ Kazinform تىلشىسىنە حابارلادى.

- قازىرگى ۋاقىتتا شىعىس قازاقستانداعى قويمالاردان وزەنگە سەكۋندىنا 1000 تەكشە مەتر سۋ جىبەرىلىپ وتىر. ەرتىس باسسەيندىك ينسپەكتسياسىنىڭ مالىمەتىنە سۇيەنسەك، قىركۇيەك ايىندا بۇل كولەم 1500 تەكشە مەترگە ۇلعايۋى مۇمكىن. وسىعان بايلانىستى مال ازىعىن دايىنداپ جاتقان شارۋاشىلىقتار شابىلعان شوپتەرىن بيىكتەۋ جەرلەرگە تاسىپ الۋى كەرەك دەپ ويلايمىز. ءبىزدىڭ ەسەبىمىز بولجام عانا، جاعداي ءبىز ايتقانداي بولماۋى دا مۇمكىن. سۋدىڭ بوساتىلۋ كولەمى وزگەرىسسىز قالۋى دا عاجاپ ەمەس. ساقتىقتا قورلىق جوق ەكەنىن ەسكەرگەن ابزال. ەرتەڭ ەرتىستىڭ تومەنگى بولىگىندە ورنالاسقان جايىلمالارعا سۋ جايىلاتىن بولسا، شارۋالاردىڭ جاز بويعى ەڭبەگى دالاعا كەتەتىنى انىق. ال قويمالاردىڭ بۇل ارەكەتى جينالعان سۋدىڭ كوپتىگىنە بايلانىستى ەرىكسىزدەن جاسالىپ وتىر، - دەپ جاۋاپ بەردى ديار قايىركەنوۆ.

باسقارما وكىلى ايتقانداي، بيىل كوكتەمدە سۋ تاسىعاندا ەرتىس جايىلمالارىنىڭ � دان استامىنا سۋ جايىلدى.

ال قىركۇيەك ايىندا وزەن تاعى كوتەرىلەتىن بولسا، اقتوعاي، ەرتىس، پاۆلودار اۋداندارىنىڭ جايىلمالارىنا قايتادان سۋ كىرۋى مۇمكىن.

ەسكە سالا كەتەيىك، بيىل كوكتەمدە وزەن جايىلماسىنىڭ 85 پايىزىن سۋ باسادى دەگەن بولجام ايتىلعان.

اۆتور
مۇرات اياعان