بىرنەشە كۇن بۇرىن ەلىمىزدە تاڭبالاناتىن تاۋارلار ءتىزىمى كەڭەيگەن ەدى. و ك ق-داعى بريفينگتە جۋرناليستەر وسى كەڭەيۋدىڭ تۋىنداعان قيىندىقتارعا اسەر ەتىپ-ەتپەگەنىن سۇرادى.
TANBA تاۋارلاردى تاڭبالاۋ جانە قاداعالاۋ ءبىرىڭعاي وپەراتورىنىڭ باسقارۋشى ديرەكتورى المات يسمايلوۆ جۇيەدە جاپپاي ىركىلىس بولماعانىن ايتتى.
- 9 جانە 10-قىركۇيەكتە تەمەكى ونىمدەرى بويىنشا قۇجاتتاردى وڭدەۋ ۇزاعىراق ۋاقىت الدى. جۇيە جۇمىس ىستەپ تۇردى، تەك قۇجاتتار ادەتتەگىدەن باياۋ وڭدەلدى. بۇعان تەحنيكالىق سەبەپ اسەر ەتتى. اتاپ ايتقاندا جۇيەنىڭ دەرەكتەر قويماسىنىڭ جۇمىس قۋاتى ۋاقىتشا تومەندەدى. بۇل تاڭبالاناتىن تاۋارلار ءتىزىمىنىڭ كەڭەيۋىنە بايلانىستى ەمەس. ءبىز تەحنيكالىق قولداۋ قىزمەتىن كۇشەيتىلگەن رەجيمگە اۋىستىردىق. وسى ەكى كۇندە قولداۋ قىزمەتىنە شامامەن 43 ءوتىنىش كەلىپ ءتۇستى. ايتا كەتەيىن، تاڭبالاۋ جۇيەسىندە تەمەكى بۇيىمدارى بويىنشا 60 مىڭنان استام پايدالانۋشى تىركەلگەن، - دەدى المات يسمايلوۆ.
سونداي-اق ەرەجە بويىنشا جۇيەدەگى تەحنيكالىق ىركىلىس تۋرالى اقپارات وپەراتوردىڭ رەسمي بەتىندە جاريالاندى. پايدالانۋشىلار ەرەجەدە قاراستىرىلعان قاعاز قۇجاتتارمەن جۇمىس ىستەۋدىڭ ۋاقىتشا ءتارتىبىن قولدانا الدى. بۇل قۇجاتتاردى جۇيەنىڭ جۇمىسى قالپىنا كەلگەننەن كەيىن وعان ەنگىزۋ كەرەك.