قىرعىزستاندا تاسقىن كەزىندە ءبىر وتباسىنىڭ ءتورت ادامى ءىز- ءتۇزسىز كەتتى

وش. KAZINFORM - قرىعىزستاننىڭ وش قالاسىندا سەل كەزىندە ءتورت ادام ۇشتى-كۇيلى جوعالىپ كەتتى. بۇل جايىندا 24.kg رەسۋرسىنان حابارلاندى.

وش قالاسىنىڭ «مولبۇلاق» دەمالىس ورتالىعىندا دەمالىپ جاتقان ءتورت ادامدى تاسقىن سۋ الىپ كەتكەن. بۇل تۋرالى الەۋمەتتىك جەلىلەردە قالا مەرياسىنىڭ باسشىسى جۇماميدين سۋلايمانقۇلوۆ مالىمدەدى.

«اعىن سۋ سونداي- اق جەتى كولىكتى اعىزىپ اكەتتى، ونىڭ تورتەۋى تابىلدى» دەيدى ول.

قالادا توتەنشە جاعداي رەجيمى جاريالاندى.

ت ج م الدىن الا اقپاراتى بويىنشا، سۋ تاسقىنىندا جوعالىپ كەتكەن ادامدار - ءبىر وتباسىنىڭ مۇشەلەرى، ياعني 44 جاستاعى اناسى مەن 19، 8 جانە 6 جاسار ءۇش قىزى.

قازىرگى ۋاقىتتا ىزدەستىرۋ- قۇتقارۋ جۇمىستارى جالعاسىپ جاتىر. وقيعا ورنىندا 46 قۇتقارۋشى جۇمىس ىستەۋدە، 420 ادام ەۆاكۋاتسيالانعان.

وش وبلىسى اۋماعىنداعى كۇشتى سەلدەن كەيىن قاراسۋ اۋداندىق ەلەكتر جەلىلەرىنەن ەلەكتر قۋاتىن الاتىن 7,5 مىڭ تۇتىنۋشى جارىقسىز قالدى.

سۋ تاسقىنى 8 ەلەكتر تىرەگىن شايىپ كەتتى.

قازىرگى ۋاقىتتا قالپىنا كەلتىرۋ جۇمىسىنا 26 ادام جانە 6 ارنايى تەحنيكا جۇمىلدىرىلعان.

ت ج م مالىمەتىنە سەنسەك، 134 ءۇيدى سۋ باسىپ، 17 ءۇيدىڭ قورشاۋىن قيراتتى.

سەلدەن زارداپ شەككەن 30 ادام دارىگەر كومەگىنە جۇگىنگەن. ونىڭ ىشىندە 17 سىنە جەرگىلىكتى جەردە كومەك كورسەتىلدى، توعىز ادام قالالىق كلينيكاعا، ءتورت ادام وبلىستىق اۋرۋحاناعا جاتقىزىلعان.