قىرعىزستاندا قازاقستاندىق جوعارى وقۋ ورىندارىنىڭ فيليالدارى اشىلادى

استانا. KAZINFORM - قىرعىزستاندا قازاقستاندىق تەحنيكالىق جوعارى وقۋ ورىندارىنىڭ فيليالدارىن اشۋ جوسپارلانۋدا. بۇل تۋرالى ق ر سىرتقى ىستەر ءمينيسترى مۇرات نۇرتىلەۋ بىشكەكتە وتكەن باسپا ءسوز ءماسليحاتىندا مالىمدەدى.

قىرعىز ارىپتەسىمەن كەلىسسوزدەر قورىتىندىسى بويىنشا سىرتقى ىستەر ءمينيسترى مۇرات نۇرتىلەۋ مادەني- گۋمانيتارلىق سالاداعى ىنتىماقتاستىقتى كەڭەيتۋ تۋرالى ايتىپ بەردى.

«ءبىز ءبىلىم بەرۋ سالاسىندا ءوزارا ءىس-قيمىلدى بەلسەندى تۇردە ارتتىرىپ جاتىرمىز. ءال-فارابي اتىنداعى قازاق ۇلتتىق ۋنيۆەرسيتەتى مەن ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتى بىشكەك پەن وش قالالارىندا ءوز فيليالدارىن اشتى. مەنىڭ ويىمشا، بۇل تاجىريبە ودان ءارى جالعاسادى. بۇگىن ءبىز قىرعىزستاندا تەحنيكالىق جوعارى وقۋ ورىندارىن اشۋ ماسەلەسىن تالقىلادىق. اتىراۋ مۇناي جانە گاز ينستيتۋتى ءوز فيليالىن اشۋدى جوسپارلاپ وتىر. سونداي- اق، «KAZ Minerals Bozymchak» وندىرىستىك كاسىپورنى جانىندا كاسىپتىك- تەحنيكالىق ۋچيليشە اشىلادى»، - دەدى مۇرات نۇرتلەۋ.

مينيستر قىرعىز تاراپىنان سۇرانىس بولعان جاعدايدا قازاقستان قىرعىزستان ستۋدەنتتەرى ءۇشىن ق ر جوعارى وقۋ ورىندارىنا گرانتتار مەن كۆوتالاردى ۇلعايتۋعا دايىن ەكەنىن جەتكىزدى.

ەسكە سالا كەتسەك، مۇرات نۇرتىلەۋ رەسمي ساپارمەن بىشكەككە كەلدى.

ول قىرعىز رەسپۋبليكاسى سىرتقى ىستەر مينيسترلىگىنىڭ باسشىسى جەيەنبەك كۋلۋبايەۆپەن كەلىسسوزدەر جۇرگىزدى. ونىڭ بارىسىندا قىرعىزستان پرەزيدەنتى سادىر جاپاروۆتىڭ قازاقستانعا رەسمي ساپارمەن كەلەتىنى بەلگىلى بولدى.

اۆتور

ايجان سەرىكجان قىزى