قىرعىزستاندا قازا بولعان بالالاردىڭ دەنەلەرى وسكەمەنگە ارنايى بورتپەن جەتكىزىلدى
وسكەمەن. KAZINFORM - قىرعىزستانداعى وش وبلىسىنىڭ نووكات اۋدانىندا سەلدەن قازا بولعان اۋىل تۇرعىندارى مەن تۋريستەر اراسىندا شىعىس قازاقستاننىڭ 4 بالاسى بار.
قايعىلى وقيعا بولعان كۇنى ەكى ۇل مەن ەكى قىز انالارىمەن تۋىستارىنا قوناققا بارعان. تۋريستىك ايماقتا جۇرگەن سەل شىعىسقازاقستاندىقتاردىڭ ءومىرىن قيىپ كەتتى.
ش ق و اكىمى باسپا ءسوز قىزمەتىنىڭ مالىمەتىنە سۇيەنسەك، بۇگىن بالالاردىڭ دەنەلەرىن وسكەمەنگە ارنايى بورتپەن جەتكىزدى. ءوڭىر اكىمدىگىندە بالالاردىڭ تۋىستارىنا كومەك كورسەتۋ ءۇشىن جەدەل شتاب قۇرىلىپ، وعان بارلىق قىزمەتتەردىڭ ماماندارى جۇمىلدىرىلدى.
- ايماق باسشىسى ەرمەك كوشەربايەۆ مارقۇمداردىڭ تۋىستارىمەن كەزدەستى. وسى قيىن كۇندەردە جەرگىلىكتى اتقارۋشى ورگاندار مەن «حاليفا التاي» مەشىتىنىڭ قىزمەتكەرلەرى جەرلەۋ ءراسىمىن وتكىزۋدى ءوز مويىندارىنا الدى. ءوڭىردىڭ كاسىپورىندارى مەن بيزنەس وكىلدەرى وتباسىلارعا كومەك كورسەتۋگە دايىن ەكەندىكتەرىن ءبىلدىردى. اكىمدىك قىزمەتكەرلەرى مەن شىعىس قازاقستان وبلىسىنىڭ تۇرعىندارى قايعىلى وقيعاعا بايلانىستى بالالاردىڭ تۋىستارىنا كوڭىل ايتتى، - دەلىنگەن اقپاراتتا.
وسىعان دەيىن قىرعىزستاندا جويقىن سەلدىڭ سالدارىنان قازاقستاندىق بالالاردىڭ قۇربان بولعانىن جازدىق.