قىرعىزستاندا مەملەكەتتىك توڭكەرىس جاساماق بولعان ءبىر توپ ادام قولعا ءتۇستى

استانا. KAZINFORM - قىرعىز رەسپۋبليكاسىنىڭ ۇلتتىق قاۋىپسىزدىك مەملەكەتتىك كوميتەتىنىڭ قىزمەتكەرلەرى ەلدىڭ تۇراقتىلىعىنا قاۋىپ ءتوندىرۋى مۇمكىن مەملەكەتتىك توڭكەرىس جاساۋ ارەكەتىنىڭ جولىن كەستى، دەپ جازدى انادولى 24.kg اقپارات اگەنتتىگىنە سىلتەمە جاساپ حابارلادى.

مالىمدەمەدە ايتىلعانداي، ءبىر توپ ادام قولدان جاسالعان بەينەماتەريالداردى پايدالانىپ، ۇلتارالىق الاۋىزدىق پەن الەۋمەتتىك نارازىلىق تولقىنىن تۋدىرۋدى كوزدەگەن.

اتاپ ايتقاندا، ارانداتۋشى ۆيدەو تاراتۋ جوسپارلانعان، وندا شەتەلدىكتەر جارتىلاي جالاڭاش قىرعىز قىزىن ۇرىپ جاتقان كورىنىس بەرىلۋى ءتيىس بولعان.

ۇ ق م ك- ءنىڭ مالىمدەۋىنشە، مۇنداي جالعان اقپارات تاراتۋدىڭ ماقساتى - «پاتريوتتىق سەزىمدى قوزدىرۋ» جانە «جاستاردى جاپپاي نارازىلىق اكسيالارىنا جۇمىلدىرۋ» بولعان.

- قاۋىپسىزدىكتى قامتاماسىز ەتۋ، كونستيتۋتسيالىق قۇرىلىمدى جانە ازاماتتاردىڭ قۇقىقتارىن قورعاۋ ماقساتىندا ۇقمك ۇلتتىق ارازدىقتى قوزدىرۋ ارەكەتتەرىن، ياعني جەرگىلىكتى جانجال شعارىپ، ونىڭ ارتى جاپپاي نارازىلىققا ۇلاسۋىنا جول بەرمەۋ شارالارىن قولعا الدى، - دەلىنگەن ۆەدومستۆو حابارلاماسىندا.

مەكەمەنىڭ مالىمەتىنشە، بۇل ارانداتۋلاردىڭ ارتىندا الدىن الا جوسپارلانعان سسەناريمەن ارەكەت ەتكەن توپ تۇرعان.

جالعان اقپارات تاراتىپ قانا قويماي، ارنايى دايىندىقتان وتكەن، قارۋمەن جابدىقتالعان توپتاردى قاتارعا قوسۋ جوسپارلانعان.

ۇيىمنىڭ باستى ماقساتى - شەتەل ازاماتتارى تۇرىپ جاتقان جانە جۇمىس ىستەيتىن اۋدانداردا قاقتىعىستاردى ارانداتۋ، سونداي-اق قۇقىق قورعاۋ ورگاندارىنىڭ وكىلدەرىنە شابۋىل جاساۋ بولعان.

قىرعىزستاندىق ب ا ق- تىڭ حابارلاۋىنشا، بۇل تارتىپسىزدىكتەردىڭ مودەلى 2024 -جىلدىڭ مامىرىندا بىشكەكتە بولعان وقيعالارعا ۇقساس، سول كەزدە وڭتۇستىك-شىعىس ازيادان شىققان ازاماتتار جاپپاي توبەلەستەن زارداپ شەگىپ، تونالعان ەدى.

- بارلىق ارەكەتتەر مەملەكەتتىك ورگانداردى قارالاۋ جانە ەلدىڭ قازىرگى باسشىلىعىنا دەگەن سەنىمدى السىرەتۋگە باعىتتالعان. سىرتتان ۇيلەستىرىلىپ، قارجىلاندىرىلاتىن اۋقىمدى نارازىلىقتار ءۇشىن جاعداي جاساۋ جوسپارلانعان، - دەپ اتاپ ءوتتى ۆەدومستۆو.

وپەراتيۆتىك ءىس-شارالار توپتىڭ ارەكەتىن دەر كەزىندە انىقتاپ، ونىڭ جولىن كەسۋگە مۇمكىندىك بەردى.

ارنايى قىزمەتتىڭ مالىمەتىنشە، قىرعىزستان اۋماعىندا ارەكەت ەتكەن قاتىسۋشىلار ۇستالدى. الايدا ۇيىمداستىرۋشىلاردىڭ ءبىرى، الدىن الا بولجام بويىنشا، بىرىككەن اراب امىرلىكتەرىندە (ب ا ءا) بولۋى مۇمكىن.

- ۇ ق م ك ەلدەگى جاعدايدى تۇراقسىزداندىرۋعا باعىتتالعان كەز كەلگەن ارەكەتتەرگە قاتاڭ توسقاۋىل قويىپ وتىرادى جانە ازاماتتاردى ۇلتارالىق تاتۋلىق پەن كونستيتۋتسيالىق ءتارتىپتى بۇزۋعا باعىتتالعان ارانداتۋلارعا ەرمەۋگە شاقىرادى، - دەلىنگەن مالىمدەمەدە.

ەسكە سالا كەتەيىك، بۇعان دەيىن قىرعىزستاندا راقىمشىلىق قولدانىلمايتىن قىلمىستار ءتىزىمى كەڭەيتىلگەنىن جازعان بولاتىنبىز.