قىرعىزستاندا جويقىن سەل تاسقىنىنان قازاقستاندىق بالالار كوز جۇمدى
استانا. قازاقپارات – 28-ماۋسىمدا قىرعىزستاندا نوسەر جاۋىن-شاشىن سالدارىنان وش وبلىسىنىڭ نووكات اۋدانىندا جويقىن سەل تاسقىنى ءوتتى. قازاقستان سىرتقى ىستەر مينيسترلىگى وسىنىڭ سالدارىنان تۇرعىندار مەن تۋريستەر اراسىندا زارداپ شەككەندەر بار ەكەنىن مالىمدەدى.
قىرعىزستاننىڭ توتەنشە جاعداي مينيسترلىگىنىڭ الدىن الا بەرگەن اقپاراتى بويىنشا، قازا تاپقانداردىڭ اراسىندا قازاقستاننىڭ كامەلەتكە تولماعان ازاماتتارى بار. قازىرگى تاڭدا ەكى بالانىڭ دەنەسى تابىلىپ، تاعى ەكەۋىن ىزدەۋ جۇمىستارى جالعاسىپ جاتىر.
تابيعي اپات ورنىندا قىرعىز تاراپىنىڭ قۇتقارۋ قىزمەتتەرى جۇمىس ىستەپ جاتىر. قازاقستاندىق ديپلوماتتار جەرگىلىكتى بيلىكپەن تۇراقتى بايلانىستا.
«ءبىزدىڭ قىرعىزستانداعى ەلشىلىگىمىز قايتىس بولعان بالالاردىڭ تۋىستارىنا بارلىق قاجەتتى كومەك كورسەتىپ جاتىر. بۇل قايعىلى وقيعا ق ر سىرتقى ىستەر مينيسترلىگىنىڭ ەرەكشە باقىلاۋىندا»، - دەلىنگەن س ءى م حابارلاماسىندا.
وسىعان بايلانىستى قازاقستان سىرتقى ىستەر ءمينيسترى مۇرات نۇرتىلەۋ قىرعىزستان س ءى م باسشىسى جەەنبەك كۋلۋبايەۆپەن تەلەفون ارقىلى سويلەسىپ، توتەنشە جاعدايدىڭ ءمان-جايىن جانە ەكى ەلدىڭ ءتيىستى مەملەكەتتىك ورگاندارىنىڭ ءوزارا ءىس-قيمىلىن تالقىلادى.
وش وبلىسىنىڭ نووكات اۋدانىندا سەل سالدارىنان 5 ادام قازا تاۋىپ، تاعى ەكەۋى ءىز-ءتۇزسىز جوعالعانىن جازعان ەدىك.