قىرعىزستاندا جۇك كولىگى قاققان 19 بالا ءالى اۋرۋحانادا جاتىر

بىشكەك. KAZINFORM - جەرگە-تال اۋىلىندا ماناسشىلار سايىسى كەزىندە جۇك كولىگى قاعىپ، جاراقات العان 19 بالا اۋرۋحانادا جاتىر، دەپ جازادى 24.kg.

ەلدىڭ دەنساۋلىق ساقتاۋ ءمينيسترى الىمقادىر بەيشەناليەۆتىڭ ايتۋىنشا، بىشكەك اۋرۋحاناسىندا جاتقان ون بالانىڭ ۇشەۋىنە وتا جاسالعان.

«ولاردىڭ جاعدايى تۇراقتى، ورتاشا اۋىر. تورتەۋى جانساقتاۋ بولىمىندە، قالعاندارى بولىمشەلەردە جاتىر. جالال-ابادتا توعىز بالا ەمدەلىپ جاتىر، ونىڭ بەسەۋىنىڭ جاعدايى ورتاشا اۋىر، قالعاندارىنىڭ جاعدايى ءبىرقالىپتى، بىرەۋى ۇيىنە شىعارىلدى. قالعانىنىڭ ءبارى كونسەرۆاتيۆتى ەم الادى»، - دەدى ەلدىڭ دەنساۋلىق ساقتاۋ ءمينيسترى.

جالال-اباد وبلىسى سوزاق اۋدانى جەرگە-تال اۋىلىندا وتكەن جاس ماناسشىلار بايقاۋى قايعىلى وقيعامەن اياقتالدى.

جايلاۋدا ءوتىپ جاتقان شارادا مەكتەپ وقۋشىلارى «ماناس» ەپوسىنان ءۇزىندى وقىدى.

وقيعا كەزىندە جينالعان جاسوسپىرىمدەردى «پورتەر» جۇك كولىگى قاعىپ كەتتى. 34 بالا زارداپ شەكتى. جۇرگىزۋشى ءۇيقاماققا شىعارىلدى.

بۇعان دەيىن 2-مامىر كۇنى قىرعىزستاننىڭ جالال-اباد وبلىسىنىڭ سوزاق اۋدانىندا بالمۇزداق تيەگەن شاعىن جۇك كولىگى 29 بالانى قاعىپ كەتكەنىن حابارلاعان ەدىك.

ارتىنشا جۇك كولىگىنىڭ جۇرگىزۋشى ۇستالعان بولاتىن.

قايعىلى وقيعاعا بايلانىستى قىرعىزستاننىڭ 12 پوليتسيا قىزمەتكەرى جازالاندى.

اۆتور
ەركەجان سماعۇلوۆا