قىرعىزستاندا جاسىرىن بوسانۋعا رۇقسات بەرىلمەكشى

استانا. KAZINFORM - ەل پارلامەنتىندە جاسىرىن بوسانۋدى زاڭداستىراتىن زاڭناماعا تۇزەتۋلەر ەنگىزىلدى، دەپ حابارلايدى Kazinform ءتىلشىسى.

ءتيىستى زاڭ جوباسى قوعامدىق تالقىلاۋعا شىعارىلدى.

قولدانىستاعى زاڭنامانىڭ تەتىكتەرى قيىن ومىرلىك جاعدايعا تاپ بولعان، بالا تاربيەلەگىسى كەلمەيتىن نەمەسە تاربيەلەي المايتىن جۇكتى ايەلدەر ءۇشىن ءتيىمدى ەمەس ەكەنى اتاپ ءوتىلدى.

- قىرعىز رەسپۋبليكاسىنىڭ زاڭناماسى جۇكتى ايەلدەر پەرزەنتحاناعا بوسانۋعا بارعاندا جەكە باسىنىڭ دەرەكتەرىن كورسەتۋدى تالاپ ەتەدى. اتى-ءجونىن جاسىرعىسى كەلەتىن كەيبىر ايەلدەر دەنساۋلىق ساقتاۋ ۇيىمدارىنان تىس جەردە بوسانىپ، ءوز دەنساۋلىعى مەن بالانىڭ ومىرىنە ايتارلىقتاي قاۋىپ توندىرەدى، - دەپ تۇسىندىرەدى باستاماشى.

زاڭ جوباسىنا «جاسىرىن بوسانۋ» اتتى جاڭا تەرمين ەنگىزىلدى. بولاشاقتا جۇكتى ايەلدەر مەملەكەتتىك مەديتسينالىق ۇيىمداردارعا بارىپ، قۇجات كورسەتپەي-اق كومەككە جۇگىنە الادى. انا مەن بالانىڭ دەنساۋلىعىنا قاۋىپ تونبەۋى ءۇشىن، بالا قاۋىپسىز ورتادا دۇنيەگە كەلۋى ءۇشىن مەديتسينالىق ورتالىق انونيمدىك جانە قۇپيالىلىق شارتتاردا بۇركەنشىك ات پەن كودتىق ءسوزدى بەرە وتىرىپ، دەربەس دەرەكتەردى سايكەستەندىرەتىن بولادى.

ستاتيستيكالىق مالىمەتتەرگە سايكەس، 2020 -جىل مەن 2025 -جىلدىڭ اقپان ايى ارالىعىندا جاڭا تۋعان نارەستەنى تاستاپ كەتۋ بويىنشا اقپاراتتىق جۋرنالعا 101 قىلمىس تىركەلگەن.

ونىڭ ىشىندە:

انانىڭ بالادان باس تارتۋى نەمەسە بوسانعاننان كەيىن پەرزەنتحانادان قاشىپ كەتۋ جاعدايى - 6؛
تاستاندى بالا - 76؛
ءولى كۇيىندە تابىلعان سابيلەردىڭ مۇردەسى (ساياباققا قالدىرۋ، قوقىسقا تاستاۋ، قوقىس جاشىگىنە سالىپ كەتۋ) - 19.
جاسىرىن بوسانۋعا رۇقسات بەرەتىن ينستيتۋت قۇرۋ ارقىلى بالا مەن انا ءومىرىن، دەنساۋلىعىن ساقتاۋ كوزدەلەدى. ءسابيدىڭ قاۋىپسىز ورتادا دۇنيەگە كەلۋىنە جاعداي جاسالماق. اتى-ءجونىن جاريا قىلعىسى كەلمەيتىن انا ءۇشىن دەربەس دەرەگىن جاسىرا وتىرىپ، قاجەتتى مەديتسينالىق كومەك الۋىنا مۇمكىندىك بەرۋ قاراستىرىلعان.

ەسكە سالا كەتەيىك، بۇعان دەيىن قىرعىزستان مەملەكەتتىك تىركەۋسىز ءدىني نەكەگە تىيىم سالماقشى ەكەنىن جازعان بولاتىنبىز.