قىرعىزستاندا فەرمەرلەر 2030 -جىلعا دەيىن جەر سالىعىنان بوساتىلادى
استانا. KAZINFORM - قىرعىزستاندا فەرمەرلەر مەن اۋىل شارۋاشىلىعى ءونىمىن وندىرۋشىلەر 2030 -جىلعا دەيىن جەر سالىعىن تولەۋدەن بوساتىلادى، دەپ حابارلايدى كابار.
بۇل تۋرالى مەملەكەتتىك سالىق قىزمەتى ءتوراعاسىنىڭ ورىنباسارى كۋبانىچبەك ىسابەكوۆ «بيرينچي راديو» تىكەلەي ەفيرىندە حابارلادى.
ونىڭ ايتۋىنشا، قازىرگى ۋاقىتتا اۋىل شارۋاشىلىعى سالاسى ءۇشىن ءبىرقاتار سالىقتىق جەڭىلدىكتەر قاراستىرىلعان.
ەسكە سالا كەتەيىك، بۇعان دەيىن جەر سالىعىنان بوساتۋ شاراسى ءۇش جىلعا ارنالعان ەدى. الايدا ۇسىنىلىپ وتىرعان وزگەرىستەرگە سايكەس، بۇل مەرزىمدى تاعى بەس جىلعا ۇزارتۋ جوسپارلانىپ وتىر.
وسىدان بۇرىن قىرعىزستاننىڭ دەنساۋلىق ساقتاۋ مينيسترلىگىنىڭ باسشىسى ەركين چەچەيبايەۆ ەل حالقىنىڭ قوعامدىق دەنساۋلىعىن جاقسارتۋ ماقساتىندا تەمەكىگە سالىناتىن اكسيزدىك سالىقتى ارتتىرۋدى ۇسىندى.