قىرعىزستان ىشكى ىستەر مينيسترلىگى بيلىكتى كۇشپەن باسىپ الۋ ءۇشىن جاپپاي تارتىپسىزدىكتەر ۇيىمداستىرماق بولعان كۇدىكتىلەردىڭ ۇستالعانىن حابارلادى.
مالىمەتتەرگە قاراعاندا، بۇل ۇيىمداسقان توپ جاپپاي تارتىپسىزدىكتەر ۇيىمداستىرىپ، بيلىكتى كۇشپەن باسىپ الۋ ماقساتىندا قۇرىلعان.
- بىشكەك توڭىرەگىندە سپورتتىق ويىندار مەن باسقا دا جارىستار وتكىزۋ جوسپارلانعان بولاتىن. ۇلتتىق سپورت ويىندارىن وتكىزەمىز دەگەن سىلتاۋمەن ولار 2024 -جىلعى 17-قاراشادا وتەتىن جەرگىلىكتى كەڭەس سايلاۋى كۇنى كۇش كورسەتۋگە ۇندەپ، كونستيتۋتسياعا قايشى شاقىرۋلاردى ناسيحاتتاپ، كەيىننەن بيلىكتى كۇشپەن باسىپ الۋ ارقىلى جاعدايدى تۇراقسىزداندىرۋدى كوزدەگەن، - دەلىنگەن ىشكى ىستەر مينيسترلىگى مالىمدەمەسىندە.
وسى جاعدايعا بايلانىستى جينالعان ماتەريالدار نەگىزىندە قىرعىزستان رەسپۋبليكاسى ىشكى ىستەر مينيسترلىگى قىرعىزستان قىلمىستىق كودەكسىنىڭ 36-278-بابى، 1-بولىگى بويىنشا جاپپاي تارتىپسىزدىكتەر ۇيىمداستىرۋعا دايىندالۋ فاكتىسى بويىنشا قىلمىستىق ءىس قوزعالعان.
تەرگەۋ بارىسىندا بۇل توپتىڭ 7 مۇشەسى تۇتقىندالدى. ولاردىڭ اراسىندا قىرعىزستاندا تۋعاندارمەن قاتار شەتەلدىكتەر دە بار.
تەرگەۋ بارىسىندا اتالعان توپقا تيەسىلى قويمادان 1000 بوتەلكە اراق، 2000 بوتەلكە مينەرالدى سۋ، 1 توننا كۇرىش، 1 سويۋعا ارنالعان جىلقى، جاپپاي تارتىپسىزدىككە قاتىسۋشىلارعا اس دايىندايتىن ونىمدەر تاركىلەنگەن.
اۆتور
جاراسقان نۇرىبايەۆ