قىرعىزستاندا بىشكەكتىڭ ورىنباسار قالا باسشىسى قاماۋعا الىندى

استانا. KAZINFORM - ءبىر كۇن بۇرىن ەل استاناسىنداعى «تۋنگۋچ» شاعىن اۋدانىندا تۇرعىندارمەن كەزدەسۋ كەزىندە بىشكەك قالاسىنىڭ ۆيتسە-مەرى جامالبەك ىرساليەۆ ۇستالدى، دەپ حابارلايدى كابار.

قىرعىز رەسپۋبليكاسىنىڭ ۇلتتىق قاۋىپسىزدىك جونىندەگى مەملەكەتتىك كوميتەتى ونىڭ قالاي ۇستالعانىن ايتتى.

ۇلتتىق قاۋىپسىزدىك كوميتەتىنىڭ مالىمەتىنشە، بىشكەك اكىمىنىڭ ورىنباسارى جامالبەك ىرسالييەۆ قىزمەتتىك جاعدايىن اسىرا پايدالانىپ، اۋدانى 1500 شارشى مەترگە جۋىق كوممۋنالدىق جەر ۋچاسكەسىن ۋاكىلەتتى مەملەكەتتىك ورگانداردىڭ رۇقساتىنسىز زاڭسىز العانى جانە پايدالانعانى انىقتالعان.

«تۋنگۋچ» ىقشام اۋدانىنداعى № 36-تۇرعىن ۇيگە ىرگەلەس ورنالاسقان 4 جەڭىل كوممەرتسيالىق نىسان مەن 5 بالالار اتتراكتسيونى 6 -جىلعا جۋىق ۋاقىت ىشىندە ورناتىلىپ، جۇمىس ىستەپ تۇرعانى اتالىپ ءوتتى.

اتالعان فاكتى بويىنشا، جامالبەك ىرسالييەۆتىڭ 2020 -جىلدان بەرى بىشكەك قالاسىنىڭ ۆيتسە-مەرى (قازىرگى ۋاقىتتا بىشكەك قالاسى اكىمىنىڭ ورىنباسارى) قىزمەتىن اتقارا وتىرىپ، جوعارىدا اتالعان كوممەرتسيالىق نىسانداردى زاڭسىز ورناتىپ، ولارعا قامقورلىق جاساپ، بىشكەك قالاسى اكىمدىگىنىڭ ۋاكىلەتتى ورگاندارىنىڭ رۇقساتىنسىز جۇمىس ىستەپ، سونىڭ سالدارىنان جەرگىلىكتى بيۋدجەتكە جالعا الۋ تولەمىنەن ايتارلىقتاي زيان كەلتىرگەنى انىقتالدى.

اكىمدىك قىزمەتكەرىنىڭ بۇل ارەكەتى «تۋنگۋچ» شاعىن اۋدانى تۇرعىندارىنىڭ نارازىلىعىن تۋدىرعانى، سونداي-اق بىشكەك قالاسى وكتيابر اۋدانىنىڭ مۋنيتسيپالدى اكىمشىلىگىنىڭ ساياباق پەن بالالار ويىن الاڭىن سالۋ جوباسىن جۇزەگە اسىرۋعا كەدەرگى كەلتىرگەنى كورسەتىلگەن. قازىرگى ۋاقىتتا زاڭسىز جۇمىس ىستەپ تۇرعان نىساندار بولشەكتەلىپ، بالالار ويىن الاڭىنىڭ قۇرىلىسى باستالدى.

قابىلدانعان شارالاردىڭ ناتيجەسىندە اتالعان ۋچاسكەنى جالعا بەرۋدەن الىنعان 2 ميلليون 979 مىڭ 889 سوم كولەمىندەگى شىعىننىڭ ورنى تولتىرىلدى.

16-شىلدە كۇنى جامالبەك ىرساليەۆ جانە ۆ. ن. ا. ەسىمدى ازامات ۇستالىپ، قىرعىز رەسپۋبليكاسى ۇلتتىق قاۋىپسىزدىك مەملەكەتتىك كوميتەتىنىڭ ۋاقىتشا ۇستاۋ يزولياتورىنا قامالدى.

قازىرگى ۋاقىتتا تەرگەۋ امالدارى جۇرگىزىلىپ جاتىر.