قىرعىزستان وڭتۇستىك كورەيادان ەكى زاماناۋي تىكۇشاق ساتىپ الادى

استانا. KAZINFORM - توتەنشە جاعدايلار مينيسترلىگى ەكى زاماناۋي كوپماقساتتى وڭتۇستىك كورەيا وندىرىسىندەگى تىكۇشاقتى ساتىپ الۋ بويىنشا بەلسەندى جۇمىس جۇرگىزىپ جاتىر، دەپ حابارلايدى كابار.

بۇل تۋرالى توتەنشە جاعدايلار ءمينيسترى بووبەك اجيكەيەۆ مالىمدەدى. ول بۇل شەشىمنىڭ قىرعىزستان پرەزيدەنتى سادىر جاپاروۆتىڭ تىكەلەي تاپسىرماسىمەن قابىلدانعانىن اتاپ كورسەتتى.

تىكۇشاقتار Korea Aerospace Industries (KAI) كومپانياسى تاراپىنان جەتكىزىلەدى. بۇل كەز كەلگەن اۋا رايىنا توتەپ بەرەتىن، جوعارى مانيەۆرلى ماشينالار، كۇردەلى تاۋلى جانە كليماتتىق جاعدايلاردا جۇمىس ىستەۋگە ارنالعان. جاڭا تەحنيكا ازاماتتىق قورعانىس، قۇتقارۋ وپەراتسيالارى، مەديتسينالىق ەۆاكۋاتسيا، گۋمانيتارلىق ميسسيالار جانە حالىقتى قورعاۋ بويىنشا باسقا دا مىندەتتەردە قولدانىلاتىن بولادى.

- بۇل - بولاشاقتاعى شىعىنداردى بولدىرماۋ جانە ادام ءومىرىن قۇتقارۋعا باعىتتالعان ستراتەگيالىق ينۆەستيتسيا، - دەدى بووبەك اجيكەيەۆ.

ەكى تىكۇشاقتىڭ قۇنى شامامەن 71 ميلليون ا ق ش دوللارىن قۇرايدى، الايدا ماڭىزدىسى - وڭتۇستىك كورەيا تاراپىنان ۇسىنىلعان ءتيىمدى قارجىلاندىرۋ بولدى:

پايىزدىق مولشەرلەمە: %0,1؛

قارىزدى وتەۋ مەرزىمى: 40 جىل؛

جەڭىلدىك كەزەڭى: 10 جىل (تولەمسىز).

- مۇنداي جاعدايلار حالىقارالىق ستاندارتتار بويىنشا دا سيرەك كەزدەسەدى. ءار مەملەكەت جوعارى تەحنولوگيالىق تەحنيكانى وسىنداي ءتيىمدى شارتتارمەن ساتىپ الۋ مۇمكىندىگىنە يە بولا بەرمەيدى، - دەپ اتاپ ءوتتى مينيستر.

ءمينيستردىڭ ايتۋىنشا، قازىرگى تاڭدا مينيسترلىكتىڭ قاراماعىندا ءۇش تىكۇشاقتان تۇراتىن اۆياتسيالىق بازا بار، ونىڭ ءبىرىن قىرعىزستان حالىقارالىق كەلىسسوزدەر اياسىندا سىيلىق رەتىندە العان.

سونىمەن قاتار، توتەنشە جاعدايلار مينيسترلىگى ماتەريالدىق-تەحنيكالىق بازانى نىعايتۋدى جالعاستىرىپ جاتىر. سوڭعى ۋاقىتتا كوپتەپ ءورت ءسوندىرۋ جانە اۋىر تەحنيكا، ارنايى قۇرال-جابدىقتار مەن كيىم-كەشەكتەر جەتكىزىلدى. جاڭا عيماراتتار سالىنىپ، قىزمەتكەرلەردىڭ ەڭبەك جاعدايلارى جاقسارىپ كەلەدى.

قازىرگى تاڭدا قىرعىزستاندا وڭتۇستىك كورەيانىڭ رەسمي بانك دەلەگاتسياسى جۇمىس ىستەپ جاتىر. قىرعىز تاراپىمەن بىرگە تىكۇشاقتاردى ساتىپ الۋ جانە تەحنيكالىق-ەكونوميكالىق نەگىزدەمەنى كەلىسۋ بويىنشا سوڭعى كەلىسسوزدەر جۇرگىزىلەدى.

بۇعان دەيىن قىرعىزستاننان شىققان قاشىقتان جۇمىس ىستەيتىن ماماندار رەسەيدەگى ەڭبەك نارىعىندا ەڭ كوپ سۇرانىسقا يە فريلانسەرلەر قاتارىنا ەنگەنىن جازعانبىز.

اۆتور

اينۇر تۋماكبايەۆا