قىرعىزستان مينيسترلەر كابينەتىن پارلامەنتتىڭ تاپسىرماسىن ورىنداۋعا مىندەتتەمەك

بىشكەك. KAZINFORM - قىرعىز رەسپۋبليكاسى جوگوركۋ كەنەشىنىڭ دەپۋتاتتارى ءۇشىنشى وقىلىمدا «قىرعىز رەسپۋبليكاسىنىڭ مينيسترلەر كابينەتى تۋرالى» قىرعىز رەسپۋبليكاسىنىڭ كونستيتۋتسيالىق زاڭىنا مينيسترلەر كابينەتىن پارلامەنتتىڭ تاپسىرمالارىن ورىنداۋعا مىندەتتەيتىن تۇزەتۋلەردى قابىلدادى.

قۇجاتتىڭ باستاماشىسى دەپۋتات داستان جۇمابەكوۆتڭ اتاپ وتۋىنشە، جوگوركۋ كەنەش شەشىمدەرىنىڭ ورىندالۋىن مينيسترلەر كابينەتى ەمەس، مينيسترلىكتەر مەن ۆەدومستۆولار دەڭگەيىندەگى اتقارۋشى بيلىك ورگاندارى قامتاماسىز ەتەدى.

ونىڭ پىكىرىنشە، زاڭدا قۇقىق كولليزياسى بار، ويتكەنى كونستيتۋتسيالىق زاڭنىڭ 13-بابىندا مينيسترلەر كابينەتىنىڭ وكىلەتتىگىندە جوگوركۋ كەنەش شەشىمدەرىن مينيسترلەر كابينەتىنىڭ ورىنداۋ نورماسى جوق.

قابىلدانعان زاڭ جوباسىنا سايكەس، مينيسترلەر كابينەتىنە جوگوركۋ كەنەشتىڭ تاپسىرمالارى نەگىزىندە قىرعىز رەسپۋبليكاسىنىڭ بۇكىل اۋماعىندا مىندەتتى كۇشى بار قاۋلىلار مەن وكىمدەر شىعارۋ جانە ولاردىڭ ورىندالۋىن باقىلاۋدى قامتاماسىز ەتۋ وكىلەتتىگى بەرىلگەن. مينيسترلەر كابينەتىنىڭ زاڭ جوباسىن قاراۋ مەرزىمىن ۇزارتقان جاعدايدا، زاڭ شىعارۋ باستاماسى سۋبەكتىسىمەن كەلىسىم بويىنشا رەسمي قورىتىندى بەرۋ مەرزىمىن 15 كۇننەن اسپايتىن مەرزىم بەلگىلەۋ ۇسىنىلادى.

بۇعان دەيىن قىرعىزستاندا ازاماتتاردىڭ وتىنىشتەرىن قاراۋ ءتارتىبىن بۇزعانى ءۇشىن مەملەكەتتىك قىزمەتكەرلەردىڭ جاۋاپكەرشىلىگىن كۇشەيتۋدى جوسپارلاپ وتىرعانى حابارلانعان بولاتىن.

وسىعان دەيىن قىرعىزستاندا ب ا ق پەن ينتەرنەت ارقىلى قورلاۋ مەن جالا جاپقاندارعا جازا كۇشەيتىلەتىنى تۋرالى جازدىق.

اۆتور
زارينا تۋعانبايەۆا