قىرعىزستان كورشىلەرىنە قانشا سۋ قاجەت بولسا، سونشا بەرەدى - سادىر جاپاروۆ

بىشكەك. KAZINFORM - بيىل قىرعىزستاندا سۋارمالى سۋ تاپشىلىعىن شەشۋ ءۇشىن جاڭا تاۋلىكتىك (ت ر ب) جانە ونكۇندىك (و ر ب) رەتتەۋشى باسسەيندەر سالىنادى، بۇل كورشى ەلدەردى دە سۋمەن قامتاماسىز ەتۋگە جاعداي جاسايدى.

بۇل تۋرالى كابار اقپارات اگەنتتىگىنە بەرگەن سۇحباتىندا قىرعىز رەسپۋبليكاسىنىڭ پرەزيدەنتى سادىر جاپاروۆ مالىمدەدى.

قىرعىزستانداعى ت ر ب جانە و ر ب- دا سۋ جيناۋ سۋارۋ ماۋسىمى كەزىندە سۋدىڭ تومەنگى جاعىنداعى ەلدەرگە كومەكتەسە مە دەگەن سۇراققا تۇسىنىكتەمە بەرە وتىرىپ، سادىر جاپاروۆ ونىڭ تاپسىرماسىمەن ەل بويىنشا جاڭا تاۋلىكتىك جانە ونكۇندىك رەتتەۋشى باسسەيندەر سالىناتىنىن، سونداي-اق قولدانىستاعىلارى تازارتىلاتىنىن، بۇل ءوز كەزەگىندە سۋارۋ ماۋسىمىندا اعىندى سۋعا قاتىستى داۋلار تۋىندايتىندىقتان، ەڭ الدىمەن تومەنگى اعىستاعى كورشىلەس ەلدەرگە پايدا اكەلەتىنىن اتاپ ءوتتى.

«قىستا ت ر ب جانە و ر ب- عا ەرىگەن سۋدى جينايتىن بولساق، كوكتەمنەن باستاپ وزەن سۋى كورشىلەرگە تولىعىمەن اعىپ كەتەدى. ياعني ولار بۇرىنعىدان دا كوپ سۋ الادى. سۋارۋ ماۋسىمىندا ديقاندارىمىز ت ر ب جانە و ر ب سۋىن، ال كورشىلەرىمىز اعىندى سۋدى پايدالانا الادى.

وتكەن جولى بىشكەكتى سۋ باسىپ كەتكەنىن كوردىڭىز. جوعارعى تاۋلىكتىك رەتتەۋشى باسسەيندەردىڭ جوقتىعىنان سۋ قالاعا اعىپ، كوشەلەردى سۋ باستى. ەگەر ت ر ب بولسا، بۇل سۋدى ساقتاۋعا بولار ەدى. بۇل جاعداي ەلىمىزدىڭ بارلىق ايماقتارىندا ورىن الىپ وتىر. ەگەر قىستا سۋ قورىن جيناساق، ول كورشىلەرىمىزگە دە مولىنان جەتەر ەدى.

قىستا اعىپ جاتقان اعىندى سۋدى كەيىننەن داۋ تۋماس ءۇشىن ءتيىمدى پايدالانۋعا تىرىسامىز. كورشىلەرىمىزگە قانشا سۋ قاجەت بولسا، سونشا بەرەمىز. سولاي بولادى»، - دەدى پرەزيدەنت.

قىرعىزستان باسشىسىنىڭ ايتۋىنشا، وتكەن جىلدارى سالىنعان ترب مەن ورب تازارتىلماعان، وسى سەبەپتى سۋ جەتكىلىكسىز جينالىپ، سۋارۋ ماۋسىمىندا جەرگىلىكتى شارۋالار سۋ تاپشىلىعىن كورگەن. بيىل بارلىق باسسەيندەردە تازالاۋ جۇمىستارى جۇرگىزىلەدى.

قىرعىز رەسپۋبليكاسىنىڭ پرەزيدەنتى قامبار-اتا س ە س-1 سالۋ ماسەلەسىنە دە توقتالدى.

«بۇل سۋ ەلەكتر ستانساسىنان كورشىلەر سۋ رەسۋرستارى تۇرىندە پايدا كورەدى، ال قىرعىزستان تەك ەلەكتر قۋاتىن عانا الىپ وتىر. ءبىز نارىن سۋىنىڭ 1 پايىزىن عانا سۋارۋ مەن اۋىز سۋعا پايدالانامىز، ال 99 پايىزى وزبەكستان مەن قازاقستانعا كەتەدى. قامبار-اتا سەس-1 سالىنىپ بىتكەندە، ءبىز ونى قىستا ەلەكتر قۋاتىن وندىرۋگە، ال سۋارۋ ماۋسىمىندا كورشىلەرىمىزگە توكتوگۋل س ە س- تا جينالعان سۋدى جەتكىلىكتى مولشەردە بەرۋگە مۇمكىندىك الامىز»، - دەپ ءتۇسىندىردى س. جاپاروۆ.

سادىر جاپاروۆ قىرعىزستان قىستا ەلەكتر قۋاتىن ءوندىرۋ ءۇشىن توكتوگۋل سۋ ەلەكتر ستانساسىن پايدالاناتىنىن، الايدا ەلدى ەلەكتر قۋاتىمەن قامتاماسىز ەتۋ ءۇشىن جازدا كەلەسى قىسقى كەزەڭگە سۋدى ۇنەمدەۋ ءۇشىن ونى توقتاتۋعا تۋرا كەلەتىنىن اتاپ ءوتتى. ولار وسى ماسەلەلەردى شەشۋ ءۇشىن جۇمىس ىستەپ جاتىر.

«ءبىز ءوزىمىزدى عانا ەمەس، كورشىلەرىمىزدى دە ويلايمىز. ماڭگىلىك كورشى بولعان سوڭ، ەڭ ماڭىزدى ماسەلەلەردى ويلاۋىمىز كەرەك. «سۋ باسىندا بولىپ، سۋ بەرمەيمىز» دەپ ايتۋ ابەستىك. ءبارىمىز باۋىرلاس حالىقپىز، ماڭگى كورشىمىز جانە ءبىر-بىرىمىزگە تاۋەلدىمىز. بارلىعىن تىزبەي-اق قويايىن، مۇنى حالىق جاقسى بىلەدى»، - دەپ تۇيىندەدى ول.