قىرعىزستان جىل باسىنان بەرى سيريادان 85 بالانى قايتاردى

استانا. KAZINFORM - قىرعىزستان جىل باسىنان بەرى سيريادان 85 بالانى قايتاردى. بۇل تۋرالى باسپا ءسوز ءماسليحاتى بارىسىندا قىرعىزستاننىڭ سىرتقى ىستەر ءمينيسترى جەەنبەك كۋلۋبايەۆ ءمالىم ەتتى، دەپ حابارلايدى كابار اگەنتتىگى.

ول «ايكول» گۋمانيتارلىق ميسسياسىنىڭ اياسىندا قىرعىزستانعا سيريادان 121 ادام قايتارىلعانىن ايتتى. ولاردىڭ اراسىندا 36 ايەل مەن 85 بالا بار.

وسىعان دەيىن قىرعىزستاننىڭ ۇلتتىق قاۋىپسىزدىك مەملەكەتتىك كوميتەتى (ق ر ۇ ق م ك) قاراكول قالاسىندا زاڭسىز جۇمىس ىستەپ جاتقان ءدىني ءبىلىم بەرۋ مەكەمەسىن انىقتاعانىن حابارلادىق.

كوميتەتتەن حابارلانعانداي، اتالعان ءدىني مەكەمە ءوز قىزمەتىن تىركەۋدەن وتپەي جانە ءدىن ىستەرى جونىندەگى ۋاكىلەتتى ورگاننىڭ رۇقساتىنسىز جۇزەگە اسىرعان.

تەكسەرۋ كەزىندە وندا ءۇش ءمۇعالىم جۇمىس ىستەپ، 35 تەن استام كامەلەتكە تولماعان بالالار ءبىلىم العان.

تەكسەرۋ قورىتىندىسى بويىنشا ءدىني ءبىلىم بەرۋ مەكەمەسىنىڭ قىزمەتى توقتاتىلىپ، الدىن الۋ شارالارى جۇرگىزىلدى.